Дьокуускай куоракка Луговой уулуссаҕа турар күнүнэн куортамнанар коттеджка тахсыбыт баһаартан төрдүс киһи өлүгүн буллулар. Бу туһунан эрэгийиэннээҕи ЫБММ пресс-сулууспата иһитиннэрэр.
Быһылаан тахсыбыт сиригэр силиэдэбэтэллэр уонна ЫБММ эрэгийиэннээҕи управлениетын баһаарынай лабораториятын үлэһиттэрэ үлэлииллэр. Санатар буоллахха, Луговой уулуссаҕа баһаар бэс ыйын 13 күнүгэр буолбута, сонно тута 3 киһи өлүгүн булбуттара, ол иһигэр биир сокуоннай сааһын туола илик кыыс. Баһаар кэннэ 19 саастаах уол сүппүтүн туһунан иһитиннэрбиттэрэ, чугас дьоно кинини көрдөөн биллэрбиттэрэ. Баһаар чахчытынан холуобунай дьыала көбүтүллүбүтэ. Сорохтор этэллэринэн, быһылаан буолар күнүгэр куорат биир эрэстэрээнин үлэһиттэрэ корпоративтаабыттар.
