Арассыыйа Силиэстийэлиир кэмитиэтин Дьокуускай куораттааҕы силисэтийэлиир салаатын силиэдэбэтэллэрэ ыам ыйын устатыгар уонна бэс ыйын саҥатыгар өлөрсүү биллэ улааппытын бэлиэтииллэр. Ол сүрүн төрүөтүнэн арыгы иһэн баран иирсии буолар.
Бэс ыйын 3 күнүгэр куорат биир балыыһатыгар мэдэссиинэ сиэстэрэтинэн үлэлиир 35 саастаах дьахтар үлэтиттэн кэлэн, 34 саастаах бииргэ олорор дьээдьэтэ арыгы иһэ олорорун сөбүлээбэккэ саҥарбыт. Онуоха анарааҥҥыта баһын хайа охсубут уонна хаста да быһахтаабыт. Дьахтар сонно тута өлөөхтөөбүт, оттон өлөрүөхсүт куота-саһа сылдьыбыт. Билигин силиэдэбэтэллэр уорбаланааччыны тараччы тутан ылан, кини өлөрбүт дьахтарын киэргэллэрин уонна баан хаартатын ыскайдаабытын бэрэбиэркэлииллэр. Уорбаланааччы оҥорбут буруйугар билиммит, дьыала салгыы силиэстийэлэнэр.
Соторутааҕыта бассаабынан тарҕаммыт видеоны көрбүт буолуохтааххыт. Бэс ыйын 5 күнүгэр Халтурин аатынан уулуссаҕа икки киһи арыгы иһэ олорбут, эмискэ айдаарсан турбуттар. Онуоха 1990 с.т. эр киһи 1985 с.т. утарсааччытыгар моонньутугар быһах туруоруорбут. Эмсэҕэлээччи суһал көмө кэлиэн иннинэ тыына быстыбыт. Өлөрүөхсүтү ааһан иһэр дьон көрөн туппуттар. Билигин кини хааллан сытар, дьыала салгыы силиэстийэлэнэр.
Арыгы туох да үтүөҕэ тиэрдибэтэ биллэр. Итирик сылдьан буруйу оҥорбут дьон, өлөрүөхсүттэр сарсыныгар ыар буруйу оҥорбуттарын олох да өйдөөбөттөрүн билинэллэр уонна дьэ бабат дииллэр диэн силиэдэбэтэллэр кэпсииллэр. Оттон арыгы иһэн баран буруйу оҥорбут дьон накаастабылы ылалларыгар өссө кытаанахтык дьүүллэнэллэрин санатабыт. Онон, туох да үтүөҕэ тиэрдибэт аһыы утаҕыттан туттунарыгт ордук.
