Таатта улууһугар "Халыма" федеральнай суолга былырыын 3 киһи өлүүлээх, 8 киһи эчэйиилээх улахан суол саахалыгар буруйдаах таксист суут уурааҕынан 4 сылга хаайылынна.
Былырыын атырдьах ыйын 28 күнүгэр 1992 сыллаах төрүөх эдэр киһи Toyota Hiace Regius массыынаннан харах быччайарынан көтүтэн иһэн, утары суолга тахсан биэрэн, Toyota Hiace массыынаны кытары харсыспыт. Ол түмүгэр 3 киһи суорума суолламмыт, 8 киһи улахан эчэйиилэри ылбыт. Суут суоппары 4 сылга поселение-холуонньатыгар утаарда уонна 3 сыл 6 ый уруулга олорорун бопто.
