Бүгүн, балаҕан ыйын 2 күнүгэр, СӨ Үрдүкү Суута урукку Ил Түмэн дьокутаатын, “Дьокуускай” аэропордун генеральнай дириэктэрин албакааттара, киниэхэ тэриллибит иккис холуобунай дьыаланы хос көрдүлэр.
Сантар буоллахха, быйыл бэс ыйын 16 күнүгэр Дьокуускай куораттааҕы суут Николай Местниковы Арассыыйа ХК 290 ыст. 6 ч., 290 ыст. 5 ч. “в” пуунунан буруйдааҕынан аахпыта. Ол эбэтэр улахан суумаҕа бэриги ылбыт диэн. Суут быһаарбытынан, Местников 2016 сылтан 2018 сыл кулун тутарыгар дылы, тэрилтэ салайааччытынан олорон, 3,5 мөл. солк. бэриги аэрпортка хомунаалынай өҥөнү оҥорор кэммиэрчискэй тэрилтэ салайааччытыттан ылбыт. Ити бэрик иһин аэропорт иһигэр туох да харгыһа суох үлэлииллэрин уонна дуогабардарын уһаталларыгар эрэннэрбит.
Суукка Местников буруйун билиммэтэҕэ. Онуоха тырааныспар борокуруора буруйдааҕын дакаастаан таһаарбыта. Суут кинини 13 сылга уураахтаабыта. Ити бастакы дьыалатын кытары тэҥинэн быһаарыллыбыт. Бастакы дьыалатын иһин 2019 сыл атырдьах ыйын 6 күнүгэр 9 сылга уонна 10 мөл. солк. уураахтаммыта. Кини оччолорго 27 мөл. солк. бэриги ылбыта дакаастаммыта.
