УФСБ пресс-сулууспата иһитиннэрэринэн, Саха сирин икки олохтоох дьахталлара омук дьонун сокуоннайа суох Российскай Федерацияҕа киллэриигэ буруйданнылар.
Силиэстийэ быһаарбытынан, дьахталлар сымыйанан омук дьонугар «кэргэн тахсаллар» эбит. Биллэн турар – харчы манньаҕа. Маннык «ыал буолбут» таджик дьоно Арассыыйаҕа, квотаны таһынан үс сыл олорор кыахтаналлар. Ону таһынан патеҥҥа нолуок төлүүртэн босхолоноллор.
«Сатамматах кийииттэр» инньэ гынан таджик уолаттарыгар хас да төгүл кэргэн тахса сылдьыбыттар. Манан эрэ муҥурдаммакка кинилэр өссө эбии ыраас манньыат туһугар «кинньиттиэх» кыргыттары итии хааннах омук уолаттарыгар булуунан-талыынан дьарыктаналлара биллибит.
Дьахталлар, РФ УК 322.1 ыст.2 ч. “а” п. – Омук дьоно Россияҕа сокуоннайа суох сылдьыыларын тэрийиигэ – буруйданнылар. Суут кинилэрги үс сыл усулуобунайдык көҥүллэрин быһарга уонна 180, 200 тыһ. ыстараап төлүүллэригэр уураахтаата.
