Силиэдэбэтэллэр Дьокуускай куорат ипподромугар буолбут сидьиҥ быһылаан чахчытыгар дьалаҕайдык туттуу иһин холуобунай дьыала тэрийдилэр. Бу туһунан Саха сиринээҕи Силиэстийэлиир управление Силиэстийэлиир кэмитиэтин пресс-сулууспата иһитиннэрэр.
Силиэстийэ көрдөрбүтүнэн, ахсынньы 29 күнүгэр, күнүс 13 чаас саҕана, Дьокуускай куора ипподромугар ыттар ааһан иһэр орто саастаах дьахтарга саба түспүттэр. Сидьиҥ кыыллар үгүстүк ытырбыттарын, сэймэктээбиттэрин түмүгэр дьахтар өлөөхтөөбүт.
«Миэстэтигэр силиэстийэлиир-оперативнай бөлөх тиийэ сырытта, быһылаан буолбут сирин-уотун, өлүгү көрдө уонна суһал дьайыылары оҥордо. Өлүү биричиинэтин быһаарарга судебнай-мэдиссиинискэй экспертиза ананна», - диэн пресс-сулууспа тиэрдэр.
РФ Холуобунай кодексын 293 ыстатыйатын 2 чааһынан, буруйу оҥоруу чахчыта баарынан, холуобунай дьыала көбүтүлүннэ (дуоһунастаах киһи эбээһинэһин толороругар сэрэҕэ суохтук туттубутун иһин, киһи өлүүтэ тахсыыта).
Холуобунай дьыаланы ураты суолталаах дьыалалары силиэстийэлиир салаатын бастакы следственнай отделениетын сотрудниктарыгар силиэстийэлииллэригэр анаатылар.
СКР үлэһиттэрэ бэйдиэ сылдьар ыттары тутар, ахсааннарын көрөр-истэр биэдэмистибэлэр докумуоннарын бэрэбиэркэлиэхтэрэ уонна ыттарга хаһаайыннара баалларын-суохтарын чинчийиэхтэрэ.
Эрдэтээҥҥи сонун этэринэн, тохсунньу 29 күнүгэр, күнүс куорат ипподромугар дьахтар өлүгүн булбуттара уонна сабаҕалааһын быһыытынан, дьахтарга ыттар саба түспүттэр диэн этиллибитэ. Бу суолунан икки чаас буолан баран ааһан иһэр АГАТУ устудьуона Семен Алексеев өлүгү булбута.
Бассаап ситиминэн, сонуну кэпсиир улахан саайтарга, дьахтарга ыттар саба түһэр видеолара тарҕанан, Сахабыт сирин дьонун аймаата. Манна көстөрүнэн, дьахтар хонуу устун хааман истэҕинэ, ыттар сүүрэн кэлэллэр уонна аҕыйах сөкүүндэ иһигэр сиргэ охтороот, саба түһэллэр... Саныахха олус ыарахан, курус...
