Бүгүн сарсыарда 8 чааска, Комсомольскай былаһааккаҕа, Дьокуускай куорат баһылыга Евгений Григорьев бэйдиэ сылдьар ыттары тутар биригээдэлэргэ уонна патрульнай бөлөхтөргө анаан мунньах ыытта. Бу туһунан мэрия пресс-сулууспата иһитиннэрэр.
Ахсынньы 30 күнүгэр, сарсыарда, ыттары тутууга эбии 11 биригиидэ хомулунна. Онон, дьэллик кыыллары уодьуганныыр бөлөх 15, киһитин ахсаанынан 30 буолла.
Хас биирдии биригээдэҕэ квалификациялаах үлэһиттэр, маны таһынан, кырыктаах кыыллары тутар уопуттаах кинологтар ананнылар. Бу бөлөхтөргө эбии инструктаж ыытылынна. Билиҥҥи сокуоҥҥа эппиэттэһэр ыйаахха олоҕуран, ыттары тутууга күүстээх үлэ барыаҕа.
Куорат бары уокуруктарын салааларыгар элбэх бэйдиэ ыт мунньустан сылдьар сирдэрин көрөн-истэн, тыллаан биэрэр патруллуур мобильнай бөлөхтөр ананнылар. Бүгүҥҥү сарсыардааҥҥы туругунан, бу дьаһаныыга мэрия, бырааба, муниципальнай уонна суһал сулууспа тэрилтэлэриттэн 170 үлэһит тардылынна. Маны таһынан, 47 тырааныспар көрүлүннэ.
«Биһиги уопсай сорукпут – бу күннэргэ дьоҥҥо кутталы суоһуур дьэллик ыттары дьаһайыахтаахпыт, уулуссаҕа биир даҕаны ыт суох буолуохтаах. Төһө даҕаны уустук быһыы-майгы үөдүйдэр, федеральнай сокуону тутуһан, дьайыыларбытын оҥоруохтаахпыт», - диэн Евгений Григорьев эттэ.
Санатар буоллахха, бэҕэһээ, ахсынньы 29 күнүгэр, куорат ипподромугар 53 саастаах дьахтары ыттар саба түһэн өлөрбүттэрэ. Киэһэ, Дьокуускай баһылыга Евгений Григорьев куораттааҕы Ыксаллаах быһыы-майгы кэмииссийэтигэр мунньах ыыппыта, бэйдиэ сылдьар ыттары тутууга суһал ыстаап тэриллибитэ. Автодорожнай уокурукка ыксаллаах быһыы-майгы биллэриллибитэ, оттон куорат бары территориятыгар ураты бэлэмнээх буолуу эрэсиимэ олохтоммута.
Түүннэри ыттары тутууга эбии биригээдэлэри уонна патрульнай бөлөхтөрү хомуйууга бэлэмнэнии үлэтэ буолбута. Манна РФ Ис дьыалаҕа министиэристибэтин «Якутское» диэн кинологическай сулууспатыттан уонна СӨ Ыксаллаах быһыы-майгы министиэристибэтин быыһыыр сулууспатыттан испэсэлиистэри анаабыттара.
Куорат олохтоохторо бэйдиэ сылдьар ыттары булууга көмө буолан, ыйыллыбыт төлөпүөннэргэ эрийэн биллэриэхтэрин сөп.
Диспетчерскэй сулууспа: 44-46-54, 44-42-29.
Whatsapp ситимигэр муниципальнай бырабылыанньа аһаҕас чат-бота арылынна - +7(914) 261-06-98 (манна бэйдиэ сылдьар ыттар ханна баар миэстэлэрин, аадырыстарын ыйан туран, хаартыскалары, видеолары ыытан биллэриэхтэрин сөп).
