Тохсунньу 16 күнүгэр, Мерзлотнай уулуссатын биир олбуоругар, бэйдиэ сылдьар ыттары тутарга анаммыт хапкааннарын кимэ биллибэт дьахтар кубаалданан алдьатта.
Бу дьиэ таһыгар ыкка аналлаах, уйаҕа майгынныыр, сиэккэнэн эргимтэлэммит саҥа көрүҥ хапкааны туруорбуттара. Ол күн, сарсыарда 10.30 ч. диэки итиннэ микро-оптуобус кэлбитэ, иһиттэн кубаалдалаах дьахтар тахсан баран, саҥа хапкааны маҕыйа-маҕыйа алдьатан саҕалаабыта. Ол кэнниттэн, ыты босхолоот, массыынаҕа киллэрбитэ уонна илдьэ барбыта.
Сайсары уокуругун быраабатын баһылыга Владимир Слепцов этэринэн, маннык ыт хапкаанын алдьатыылаах быһылаан маҥнайгытын тахсыбыт.
«Полицияҕа сайабылыанньа суруллубутун кэннэ, дьахтар аата-суола биллибит, кинини эппиэтинэскэ тардыахтара», — диэн Слепцов бэлиэтиир.
Бу иннинэ ыты тутааччылар, куорат сорох олохтоохторо бэйдиэ сылдьар ыттары тутууга мэһэйдииллэрин уонна хапкааннары алдьаталларын туһунан хаста даҕаны үҥсүбүттэрэ. Кинилэр, маннык быһыы-майгы чуолаан Губинскай уокурукка тахсыбытын бэлиэтээбиттэрэ.
Тохсунньу 17 күнүнээҕи куорат уопсай мунньаҕын кэмигэр, гражданнар көмүскэллэрин уонна ыксаллаах быһыы-майгы бырабылыанньатын тойоно Николай Егоров этэринэн, ахсынньы 29 күнүттэн Дьокуускай куорат иһигэр 492 хаһаайына суох ыты, ол быыһыгар Автодорожнай уокуруктан 109 ыты туппуттар. Маны таһынан, арыый элбэх бэйдиэ сылдьар ыттары Сайсары (68), Строительнай (64) уонна Бырамыысаланнай (56) уокуруктартан туппуттар. Бары дьэллик харамайдары анал тутар пууннарга илдьибиттэр. Бу туһунан, уокурук дьаһалтатын пресс-сулууспата иһитиннэрэр.
