Алдан тыраассатыгар икки улахан грузовик суоппара өйдөспөккө атааннаспыттарын түмүгэр, биир киһи өллө. Уорбаланааччы тутулунна.
Тохсунньу 21 күнүгэр, Алдан оройуонун А-360 массыына федеральнай суолун 623 килэмиэтиригэр, массыына тохтуур сириттэн сэймэктэммит киһи өлүгүн булбуттар.
Быһылаан тахсыбыт сирин уонна өлүгү көрүү, чинчийии түмүгэр быһаарбыттарынан, сиэртибэ – атын эрэгийиэнтэн кэлбит, массыына тырааныспарын тэрилтэтигэр үлэлиир, улахан грузовик суоппара, 48 саастаах эр киһи. Өлүккэ олус элбэх төбө уонна түөс эчэйиитэ, моойугар хайыта-быһыта тыытыллыбыт бааһырыы баар эбит.
Бу буруйга уорбаланааччы, 54 cаастаах атын улахан грузовик суоппара, сиэртибэтин өлөрөн баран, буруйун кистиир дьайыылары оҥороот, миэстэтиттэн куоппут. Онуоха, силиэдэбэтэллэр, криминалист силиэдэбэтэллэр уонна полиция үлэһиттэрэ табыгастаахтык дьаһананнар, буруйга уорбаланааччы баар сирин быһаара охсубуттар. Кинини бу сыл тохсунньу 24 күнүгэр Большой Нимныр диэн бөһүөлэктэн туппуттар.
Тутуллубут киһи кэпсээбитинэн, кини кэллиэгэтинээн суол кытыытынааҕы кафе таһыгар өйдөспөккө атааннаспыттарын түмүгэр, буруйун оҥорбут, онтон өлүгү дьоно суох сиргэ сытыаран баран, атахха биллэрбит.
Билигин силиэдэбэтэллэр уорбаланааччы буруйун дакаастыыр силиэстийэни ыыта сылдьаллар. Булгуччулаах экспертиза анаммыт. Сотору кэминэн, силиэдэбэтэл суукка аналлаах матырыйааллары тиксэриэҕэ.
Силиэстийэ бара турар.
Өрөспүүбүлүкэ силиэстийэлиир кэмитиэтин пресс-сулууспата
