Олунньу 16 күнэ Сунтаар улууһугар кутурҕан күнүнэн биллэрилиннэ. Олунньу 13 түүнүгэр Сунтаар улууһугар иэдээн буолбута, бүтүн дьиэ кэргэн баһаарга былдьаммыта. Кутурҕан күнүн туһунан «Сунтаар сонуннара» хаһыат суруйар.
Сунтаар улууһун баһылыга Анатолий Григорьев дьаһалынан, оройуоҥҥа бары судаарыстыбаннай былаахтары түһэриэхтэрэ.
Алдьархай Сунтаар улууһун Сунтаар нэһилиэгэр бу ый 13-с чыыһылатын түүнүгэр буолбута. Икки этээстээх чааһынай дьиэҕэ сыалай биир дьиэ кэргэн - икки улахан киһи уонна түөрт оҕо баһаарга сырдык тыыннара быстыбыта... саамай кыралара баара-суоҕа икки эрэ саастааҕа...
Баһаар тахсыытын икки биричиинэтэ көрүллэр: бастакыта – элэктэриичистибэ боруобатыттан сылтаан, иккиһэ – оһохтон сылтаан. Билиҥҥи кэмҥэ силиэстийэлиир эпэрэтиибинэй дьаһаллар ыытыллаллар.
Арассыыйа Федерациятын Силиэстийэлиир кэмитиэтин бэрэссэдээтэлэ Александр Бастрыкин баһаар чопчу тахсыбыт бирчиинэтин быһаарарга дьаһайбыт. Маны таһынан, кини бырабылаактыка систиэмэтин дуоһунастаах дьонун дьайыыларын эбэтэр дьайыыта суох буолууларын быһааран, сыанабыл туруоралларын ирдээбит.
