Үөһээ Дьааҥыга «Дьааҥы» диэн кыһыҥҥы суолга, МАЗ гурууһу тиэйэр массыына муус анныгар түстэ. Бу туһунан Саха Өрөспүүбүлүкэтин Ыксаллаах быһыы-майгыга министиэристибэтэ иһитиннэрэр.
Быһылаан олунньу 16 күнүгэр, Оһохтоох диэн сэлиэнньэттэн 10 км. тэйиччи сиргэ буолбут. Түбэлтэ тахсыбыт миэстэтигэр Үөһээ Дьааҥытааҕы ГИМС иниспиэктэрэ тиийбит.
Бэлиэтэнэринэн, массыынаҕа икки киһи баар эбит. Массыына ууга түһэн истэҕинэ, суоппар кабинаттан тахсыбыт уонна чугастааҕы бөһүөлэккэ тиийбит, кини туруга этэҥҥэ эбит. Ол эрээри, олорсон испит киһитэ көстө илик.
Сабаҕалааһын быһыытынан, быһылаан тахсыбыт биричиинэтэ – кыһыҥҥы суолга массыынаҕа муҥутаан көҥүллэнэр ыйааһыны куоһарыы.
Санатар буоллахха, маннык түбэлтэ тохсунньу 19 күнүгэр Эдьигээн улууһугар буолбута, онно улахан тыраахтыр муус анныгар түһэн, «Алмазы Анабара» хампаанньа икки үлэһитэ ууга былдьанаахтаабыттара. Эр дьону билигин даҕаны була иликтэр. Уу күүстээх сүүрүктээҕин иһин, бадалаастар көрдүүр үлэни кыайан ыыппатахтара. Онон, көрдөөһүн үлэтэ тохтотуллан хаалбыта.
