Дьокуускайга, бэс ыйын 12 күнүгэр, киэһэ 9 ч. диэки, ГИБДД дьоһуурунай чааһыгар суолга үс массыына харсыһыытын туһунан иһитиннэрии киирбит.
Полиция үлэһиттэрэ быһаарбыттарынан, 32 саастаах суоппар Toyota Probox массыынаны ыытан иһэн өйүн сүтэрбит, ол түмүгэр ПАЗ-32054 оптуобуһу уонна Toyota Corolla Spacio массыынаны кытта харсыспыт. Онуоха Toyota Corolla Spacio олорсон иһээччилэрин, 37 саастаах суоппар дьахтары, 47 саастаах дьахтары уонна Toyota Probox массыынаҕа олорсон испит 1990 сыллаах төрүөх киһини суһаллык балыыһаҕа тиэрдибиттэр, кинилэр араас истиэпэннээх эт-хаан эчэйиитин ылбыттар.
Toyota Probox суоппара суһал мэдииссинискэй көмө массыынатыгар тиэллэн иһэн өлөхтөөбүт. Маҥнайгы быһаарыынан – сүрэҕэ тохтообут (сердечный приступ). Бары биричиинэни уонна тахсыбыт быһыыны-майгыны толору быһаарыыга силиэстийэ үлэни ыытыаҕа.
Госавтоинспекция санатарынан, суоппар ыалдьыбыт эбэтэр сылайбыт туруктаах массыынаны ыытара көҥүллэммэт. Өскөтүн ыытан иһэр киһи ыарытыйар, сылайбыт эбэтэр улаханнык истириэскэ ылларбыт буоллаҕына, уруулга олорууттан батыныахтаах. Маныаха, киһи доруобуйатын туругун чэпчэтэр аналлаах эми-тому илдьэ сылдьыахтаах. Ордук чуолаан сайыҥҥы куйааска, ыраах айаҥҥа киһи бэйэтин туругар болҕомтону ууруута улахан суолталаах.
