Киир

Киир

Москуба таһыгар олорор 13 саастаах уол айаҕар электроннай сигарета эстэн, Арассыыйа үрдүнэн улахан айдаан таҕыста.

Ол күн уол эбэтэ пуочтатын дьааһыгыттан туга биллибэт тэрили булан ылбыт. Сиэнэ уол, вейп диэн муодунай тэрил буоларын билэн, бэйэтигэр ылбыт уонна улахан дьон көрбөтүгэр тардарга санаммыт. Айаҕар уган обороотун кытары, тэрилэ дэлби эстэн уоһун, тииһин уонна муннун бүтүннүү сиирэ көппүт. Хирурдар уолга, сирэйин чөлүгэр түһэрээри, хас даҕаны уустук эпэрээссийэни оҥорбуттар. Билигин силиэстийэ электроннай сигарета тоҕо эстибитин быһаара сатыыр.  Баҕар, анаан эстэр гына оҥорбуттара буолуо диэн сабаҕалааһын баар.

Уопсайынан, бу аныгы ыччат сөбүлээн тардар, муода оҥостубут электроннай сигареталара (муоданы батыһан “вейп” диэн ааттыыллар) доруобуйаҕа көннөрү табахтан итэҕэһэ суох охсор диэн суруйаллар. Вейп састаабыгар баар туустаах никотинтан син биир көннөрү табах никотиныттан курдук күүскэ ылларар диэн исписэлиистэр билэллэр. Ону эдэр дьон, буортута суох курдук санаан, күнү быһа тарда сылдар адьынаттаннылар.

Билбэт дьоҥҥо быһааран эттэххэ, вейп  мундштуктан, батареяттан уонна атомайзертан турар. Атомайзер иһигэр сылытар элэмиэн,  картридж эбэтэр убаҕастаах резервуар бааллар. Ол эбэтэр, эдэр дьон ол убаҕас паарынан тыыналлар. Маны таһынан, HQD (High Quality Death) диэн  биирдэ туттуллар электроннай сигарета баар. Бу көрүҥ, быдан табыгастаах буолан, киэҥник тарҕанна диэн суруйаллар. HQD-сигарета аккумулятортан, испирээлтэн, баттааһын датчигыттан, светодиодтан уонна ону барытын ситимниир боруобаттартан турар. Састаабыгар глицерин, пропиленгликоль уонна, буоларын курдук, туустаах никотин баар. Маны араас амтаннаах, сыттаах оҥороллор.

Арассыыйаҕа электроннай сигарета хаачыстыбатын Роспотребнадзор хонтуруоллуур. 2021 балаҕан ыйынааҕы көрдөрүүнэн, вейп састаабыгар көҥүлэ суох эттиктэри элбэхтик булаллар. Ону сэргэ, уоран-кистээн атыылыыр түөкүттэр элбэхтэр. Холобура, биир бөдөҥ импортер HQD-сигареталарын ырыынакка бытовой тэриллэр истэригэр кистээн киллэрбит. Ол сигареталар туох даҕаны бэрэбиэркэни ааспакка атыыга тахсыбыттар. Аҥаардас Москубаҕа полиция туох да докумуона суох,  киһи олоҕор кутталлаах  150 тыһ. HQD-сигаретаны былдьаабыт.   

Билигин тустаах уорганнар вейп атыылыыр маҕаһыыннарга күүстээх бэрэбиэркэни ыыта сылдьаллар. Оттон ЛДПР фракцията доруобуйаҕа улахан буортуну оҥорор электроннай сигаретаны бобор туһунан сокуон бырайыагын Судаарыстыбаннай Дуума көрүүтүгэр киллэрдэ. Фракция бэрэстэбиитэллэрэ туруорсубуппут ыраатта диэн этэр сурахтаахтар.

 Сонун төрдө: Арассыыйа  аан ситимнэрин суруйуулара 

 

Тарҕат:

Санааҕын суруй