Киир

Киир

От ыйын 27 күнүгэр ыкса киэһэ Дьокуускайга киин куораттааҕы байыаннай хамыһаар Афанасий Захаров тутуллубутун туһунан иһитиннэрии тарҕаммыта. Дьыаланы Арассыыйа Силиэстийэлиир кэмитиэтин Дьокуускайдааҕы гарнизонун байыаннай силиэстийэлиир салаата силиэстийэлиир, маны таһынан Саха сиринээҕи ФСБ управлениета эмиэ кыттыспыт. Захаровы ФСБ-лар туппуттар. Онон, бойоҥкуомҥа тэриллибит холуобунай дьыаланы сиһилии билэр уустук буолла. Силиэстийэ бара турарынан, ханнык да официальнай кэмэнтээрий диэн суох. Арай Захаровка икки ыстатыйанан – “Дуоһунастаах былааһын үрдэтиигэ” уонна “Дуоһунастаах боломуочуйатын олус туһаныыга” уорбалаан холуобунай дьыаланы көбүппүттэр.

Официальнайа суох иһитиннэриинэн, сурах курдук да иһиллэринэн, Афанасий Захаров байыаннай билиэттэри атыылааһыҥҥа уорбаланар. Биир билиэти дуу эбэтэр паачыканан атыылаабыта дуу биллибэт. Арай биир призывникка “Не годен” диэн туруорарыгар харчы көрдөөн ылбыт курдук, ону төлөһөргө кирэдьииккэ киирэн туран ылбыттар диэн кэпсииллэр. От ыйын 27 күнүгэр Дьокуускай куораттааҕы суут силиэстийэ кэмигэр Захаровы икки ыйга СИЗО-ҕа хаайарга быһаарбыт. Силиэстийэлиир уорганнар Захаров “туоһуларга дьайыыны оҥоруон сөп, силиэстийэ кэмигэр туорайдаһар кыахтаах” диэн туруорсууларын суут ылыммыт.

Бу иннинэ бойоҥкуомнар тутуллубуттарын, туох эрэ дьыалаҕа эриллибиттэрин туһунан иһитиннэрии соччо иһиллибэт, суоҕун да тэҥэ этэ. Ол эрээри “Кыһыл билиэти атыылыыллар үһү” эҥин диэн сурах сири-буору аннынан иһиллэрэ. Биир оннук сураҕынан, били, билигин 50 мөл. солк. бэриги көрдөөн уорбаланан, силиэстийэҕэ сылдьар, дьиэ хаайыытыгар уураахтаммыт блогер Сусанна Рожина Захаровы улаханнык эккирэтиспитэ буолар. Оттон Сусанна Рожинаҕа байыаннай билиэт атыыланарын туһунан иһитиннэриини урбаанньыт Игорь Осташенко “хааччыйа” олорбут дииллэр. Осташенко бэйэтэ дьыалаҕа эриллэ сылдьар. Кини урбаанньыт, уопсастыбанньык Афанасий Алексеевка: “Словакияттан эйигин өлөрөллөрүн туһунан иһитиннэрии киирбит, онуоха 10 мөл. солк. көрдүүллэр, ону туоратарга ФСБ үлэһитэ Дмитрий Лобетко эрэ көмөлөһөр кыахтаах, онуоха эн 3,5 мөл.солк. биэриэххин наада”, – диэн көрдөөбүт. Лобетконы уонна Осташенконы тутан хаайбыттара. Осташенко түөкүннээһиҥҥэ уорбаланар, сотору кэминэн суута буолуохтаах.

Аны туран, Лобетколаах Осташенко дьыалаларыгар эмсэҕэлээччи быһыытынан бойоҥкуом Афанасий Захаров сылдьар. Рожина Захаровы “буулуур” кэмигэр Захаров “ити туос сымыйа” диэн интэриниэт СМИ-лэргэ эппитэ баар. Кини: “Миигин элбэх дьарыйар, хонтуруоллуур уорган баар. Чахчы билиэт атыылыырым эбитэ буоллар, былыр үйэҕэ тутуллубут буолуом этэ”, – диэбиттээх. Захаров бэйэтэ Читаҕа үлэлээн баран, Саха сиригэр төннөн Чурапчы, Сунтаар улуустарыгар бойоҥкуомнаабыта.

Захаров уонна Осташенко уу тэстибэт доҕордуулар эбит. Ол эрээри кэлин атырдьах салаатыныы арахсыбыттар. Осташенко Захаровтан өссө 2019 сыллаахха “ФСБ-га үлэлиир атаһым оҕото ыараханнык ыалдьан, Соҕуруу Кэриэйэҕэ барарыгар үп наада буолла, көмөлөс” диэн көрдөспүт. Захаров баантан кирэдьиит ылан 2,3 мөл. солк. биэрбит. Ол эрээри Осташенко Захаров кирэдьиитин төлөөбөт буолан хаалбыт. Онуоха Захаров УФСБ салайааччыта Пахомовка тахсан билбитэ, ФСБ-га ыалдьар оҕолоох киһи суоҕа биллэн тахсыбыт.

Дмитрий Иванов

Тарҕат:

Санааҕын суруй

Бүтэһик сонуннар