Балаҕан ыйын 6 күнүгэр түүн 2.30 чаас саҕана Дежнева уулусса 20 №-дээх дьиэтигэр баар сынньанар сир аттыгар такси кэтэһэ турар паараҕа Александрга уонна Александраҕа 10-15 киһилээх «үөр» саба түспүт.
Уоллаах кыыс хайа эрэ успуорт көстүүмнээх киһи сиргэ хамсаабакка сытар биир киһини маһынан сынньа турарын көрөн тохтото сатаабыттар. Онуоха ол киһи тохтуур оннугар маһын туппутунан кинилэргэ сүүрбүт. Кинини батыһан, хантан эрэ тимиринэн уонна бытыылканан сэбилэммит доҕотторо сүүрэн кэлбиттэр уонна Александры кырбаан барбыттар. Уоллаах кыыс хаһыыларын истэн, аттынааҕы дьиэттэн кимнээх эрэ көмөҕө тахсан саба түһээччилэри тохтото сатаабыттар уонна кыыллыйбыт «үөр» утарсыытыттан улаханнык эчэйбиттэр. Александра ыҥырыытынан полиция кэлбитигэр "адьарайдар" үрүө-тараа куота турбуттар. Александр ыарахан туруктаах балыыһаҕа киирбит. Дьоҥҥо саба түһүү сорҕото таһырдьааҥҥы камераҕа уһуллан хаалбыт. Онно көстөрүнэн, Александр өйүн сүтэрэн охтон түһэр.
Бүгүн социальнай ситимнэринэн «сэбилэниилээх үөр саба түһүүтүттэн эчэйбит эбэтэр итилэртэн кими эмэ билбит, бу быһылааны көрбүт буоллаххытына, 8 (924) 1747507 сибээскэ тахсыҥ» диэн көрдөһүүлээх сурук тарҕанна. Саба түһээччилэр 15-25 cаастаах сахаларга майгыннаабат, славянныы дьүһүннээх дьон эбиттэр.
Сэҥээриилэр