Дьоллоох Дьокуускайга саҥа дьыл тыына хайыы сахха күүскэ билиннэ. Сорох дьоллоохтор Саҥа дьыллааҕы аралдьытар тэрээһиннэргэ билиэттэрин ылан, тугу кэтэллэрин, хайдах оҥостоллорун барытын быһааран олороллор.
Куйаар ситимҥэ тахсар угуйуктарынан көрдөххө, аралдьытар үлэлээх, дьарыктаах дьон Саҥа дьылга үөгүлүүр үбү, хаһыытыыр харчыны охсон ыларга үчүгэйдик туруммуттар. Ахсынньыга ол курдук элбэх, киһи мунар тэрээһинэ ыытыллаары турар. Элбэхтэн аҕыйаҕы ылан көрүөҕүҥ.
Ахсынньы 21 күнүгэр
«София» банкеттыыр саалаҕа «Улетный новогодний вечер-2» диэн аһылыктаах аралдьытар тэрээһин буолар. Ыытааччыта топовай үһү – Иван Show.
Сыаната – 4 000. Манна билиэт, аһатыы, кэнсиэр, оонньуу, үҥкүү – барыта киирэн сылдьар. Менюта чопчу биллэ илик. Итии утахтары төһөнү баҕарар аҕалар көҥүллэнэр диэн төлөпүөнэн эттилэр (!)
Эҕэрдэлииллэр: Сахая уонна Александр Бурнашовтар, "Бырааттыы норуоттар" шоу-бөлөх, Виталий Очиров, Александра Аммосова "Ай-санаа", скрипкаһыт Ольга Олешкевич.
Ахсынньы 20, 21, 27, 28 күннэригэр
«Фортуна» банкеттыыр саалаҕа «Сана дьылы тэҥҥэ көрсүөххэ» диэн аһылыктаах саҥа дьыллааҕы биэчэр. Ыытааччылара бастыҥнар үһү – Саид Григорьев уонна Жека Слепцов.
Сыаната – 4000. Эмиэ барыта киирэр.
Эҕэрдэлииллэр: Алексей Егоров-Өркөн, Игорь Егоров, Инвент, Аман Анхаров, Ирена Файрушина, Виталий Очиров.
Биир «ноолоох» – билиэтэ бүппүт. Арай ахсынньы 28 күнүгэр 12 миэстэлээх биир остуол хаалбыт.
Ахсынньы 20 күнүттэн тохсунньу 14 күнүгэр диэри
Судаарыстыбаннай Сииркэ аччыгый саалатыгар «Восточный МИКС» саҥа дьыллааҕы астаах-үөллээх киэһэлэр. Ыытааччы – Яна Фёдорова.
Сыаната – 4000
Эҕэрдэлииллэр: Сахая уонна Александр Бурнашовтар, Пётр Кулаковскай, саҥа сыл бэлиэтэ – моҕой, Марияны Саморцева балета, Егор Ефимов аркыастырын тыыннаах муусуката, оонньуулар, Тымныы Оҕонньор уонна Хаарчаана эҕэрдэтэ, дискотека.
Көрөргүт курдук, сыаналара барыларын киэнэ тэҥ – 4000. Сүбэлэспиттэр дуу диэх айылаах.
Саҥа дьыл иннинээҕи аралдьытар тэрээһин манан бүппэт, өссө да элбэх. Холобура, бүгүн блогер кыргыттар «Бабий бунт» диэн stand-up шоулара буолаары турар. Тус бэйэм, саха дьахталларын саҥаран күллэрэр талааннарын сыаналыы барыахпын баҕарбытым да, кыаллыбата. Хампаанньа суоҕа диэн, эмиэ туһунан кыһалҕа эбит. Чэ, баҕар, тохсунньутааҕы уһун өрөбүлгэ биир эмэ дьүөгэ барсарга сөбүлэһиэ.
Бэйэ кэр.
