«Олохтоох каадыры – бырамыысыланнаска» бырайыак 2017 сылтан үлэлиэҕиттэн өрөспүүбүлүкэ олохтоохторо бырамыысыланнаска үлэ булунуулара биллэ эбиллэн барбыта.
Билигин хайдах да урукку курдук “ынах кутуругуттан ырааппатах дьон” диэн сыана быһаллара табыллыбат. Тустаах бырайыак чуолаан тыа сирин олохтоохторугар туһата-көдьүүһэ улахан. Тыа сиригэр үлэ көстүүтэ урут да, аны да күчүмэҕэй. Бүддьүөт үлэһиттэриттэн атыттарга үлэ көһүннэҕинэ да, хамнаһа быыкаа. Чуолаан, ити тыа хаһаайыстыбатыгар үлэлээччилэргэ сыһыаннаах. Онон үрдүк хамнастаах, социальнай бакыаттаах бырамыысыланнас эйгэтэ – балаһыанньаттан тахсарга биир тоҕоостоох суол.
Бу хамсааһыны көҕүлүүр сыалтан хас сыл аайы өрөспүүбүлүкэҕэ бырамыысыланнас тэрилтэлэрин ортотугар “Олохтоох каадыры – бырамыысыланнаска” бырайыак бастыҥ кыттааччыта” диэн куонкурус ыытыллар. Дьарыктаах буолуу судаарыстыбаннай кэмитиэтин бэрэссэдээтэлэ Елена Калашникова ааспыт сыл түмүгүнэн тустаах куонкурус кыайыылаахтарын билиһиннэрбит.
Хампаанньалар бу хайысхаҕа үлэлэрин түмүгүн сыаналыырга хас да суолу көрөллөр. Ол курдук, үлэҕэ ылыллыбыт олохтоох нэһилиэнньэ аахсаана уонна кинилэртэн төһө бырыһыаннара бастайааннай өрүккэ үлэлии хаалбыта, эдэр исписэлиистэр стажировкаланыыларын хампаанньа төһө тэрийэрэ, дьарыктаах буолуу сулууспалара ыыппыт үлэтэ суох дьонун идэҕэ үөрэттэрэн баран үлэҕэ ылыы көрдөрүүтэ, көрдөрөр-иһитиннэрэр сириэстибэлэргэ тустаах бырайыагы олоххо киллэрии туһунан төһө сырдаталлара.
Дьэ, ити параметрдарынан сыаналаан, көрөн-үөрэтэн баран, анал хамыыһыйа маннык тэрилтэлэри кыайыылаахтарынан быһаарбыт:
— «Бырамыысыланнас уонна энергетика” хайысхаҕа – «Сахатранснефтегаз» АУо, «АЛРОСА» АХ (ПАО), «Колмар» УК ХЭУо киирбиттэр.
— «Тутуу салаата, тырааныспар уонна суол хаһаайыстыбата” хайысхаҕа –«Саха сирин тимир суоллара» АУо, «Сунтаравтодор» ХЭУо, «Автодор» РИК АУо.
Бырайыак үлэлиэҕиттэн, чопчулаан эттэххэ, 2018 сылтан саҕалаан, өрөспүүбүлүкэ 45 бырамыысыланнас хампаанньатыгар уопсайа 47,7 тыһ. өрөспүүбүлүкэ олохтооҕо үлэнэн хааччыллыбыт. Итинтэн сыччах былырыын үлэҕэ ылыллыбыта – 12,1 тыһ. киһи. Бу туһунан СӨ Ил Дарханын уонна Бырабыыталыстыбатын пресс-сулууспата иһитиннэриитигэр этиллэр.
Тустаах бырайыак, этэргэ дылы, икки куобаҕы тэҥинэн охсон ылар: бырамыысыланнас тэрилтэлэрэ бастайааннай үлэһитинэн хааччыллаллар, хантан эрэ ыраахтан бырайыас төлүү-төлүү үлэһит күүһү аҕала-такайа сатыыр кыһалҕа кыччыыр. Оттон олохтоохтор киһилии дохуоттанар, олохторун таһымын тупсарар кыахтаналлар.
Татьяна Захарова-ЛОҺУУРА
