Бу күннэргэ “Саханефтегазсбыт” АУо филиалыгар – Дьокуускайдааҕы ньиэп базатыгар киирсэр тырааныспары сапыраапкалыыр бары ыстаансыйалартан 20 ыстаарсай эпэрээтэр кыттыылаах сэминээр буолла.
Ол курдук, үлэһит идэтин үрдэтэр кууруска Хаҥалас, Горнай, Бүлүү, Нам улуустарын, Дьокуускай куорат АЗС-гар уонна КАЗС-гар үлэлиир ыстаарсай эпэрээтэрдэр кытыннылар.
Дьокуускайдааҕы ньиэп базатын дириэктэрэ Денис Чуев иһитиннэрбитинэн, сэминээр кэмигэр АЗС эксплуатациятыгар, үлэ харыстабылыгар, баһаар, бырамыысыланнас өттүнэн куттал суох буолуутугар, хонтуруолланар эбийиэктэри метрологическай хааччыйыыга, ньиэп бородуукталарын хаачыстыбатын хонтуруоллааһыҥҥа уонна килийиэннэри кытта үтүө сыһыаны олохтооһуҥҥа сыһыаннаах боппуруостары көрдүлэр.
6-с №-дээх АЗС ыстаарсай эпэрээтэрэ Лариса Ярмухаметова бэлиэтээбитинэн, баһаар уонна дэлби тэбии буолар кутталлаах эбийиэктэргэ быраабыланы, ирдэбили булгуччу тутуһуллуохтаах. Бу үөрэх сэминээрэ күннээҕи үлэҕэ-хамнаска быһаччы сыһыаннаах буолан, үлэһиккэ барытыгар олус туһалаах буолла. Тэрилтэҕэ 30 сыл ыстаастаах ыстаарсай эпэрээтэр үөрэх истиҥ эйгэҕэ ыытыллыбытын эттэ. Сүрүн управление отделларын салайааччылара лиэктэр-эспиэр быһыытынан барытын сиһилии кэпсээтилэр, быһаардылар, кыттааччылар ыйытыыларыгар сиһилии хоруйдаатылар. Маны таһынан кэлиҥҥи сылларга “Саханефтегазсбыт” АУо АЗС-тара уонна КАЗС-тара түргэн тэтиминэн саҥардыллаллар, эпэрээтэрдэр күн аайы үлэҕэ туһаналларыгар саҥа сыыппара технологиялара уонна бырагыраамалара киирэллэр. Ол иһин сэминээргэ улахан болҕомтону саҥа бырагыраамалары кытта үлэҕэ уурдулар.
– Сэминээргэ ылбыт билиибитин кэллиэгэлэрбитигэр кэпсиэхпит, саҥа уларыйыыларга үөрэтиэхпит, – диэн Лариса Владимировна эттэ. Кини – 6-с №-дээх АЗС-ка 25-тэн тахса сыл ыстаастаах ыстаарсай эпэрээтэр, онон эдэр исписэлиистэргэ уопуттаах настаабынньык буолар.
2009 сылтан тэрилтэҕэ үлэлиир 1-кы №-дээх АЗС ыстаарсай эпэрээтэрэ Алена Литвинова сэминээр уопуту атастаһыы эрэ өттүнэн буолбакка, улуустартан кэлбит үлэһиттэри кытта истиҥ эйгэҕэ алтыспыттарын, маны таһынан үлэлэригэр көрсөр кыһалҕаларын тэрилтэ салалтатын кытта быһаарсар, суһаллык харда ылар кыахтаммыттарын ордук биһирээбит. 2020 сылтан ыстаарсай эпэрээтэр бары филиаллар үлэһиттэрин хабар маннык сэминээрдэр кэмиттэн кэмигэр ыытылла туралларыгар баҕарда.
Быйыл олунньу, кулун тутар ыйдарга “Саханефтегазсбыт” АУо бары филиалларын ыстаарсай эпэрээтэрдэригэр сэминээр ыытыллара былааҥҥа баар. Маны таһынан дириэктэрдэр, сүрүн инженердэр, сүрүн буҕаалтырдар үлэлэрин отчуоттуур уонна идэлэрин таһымын үрдэтинэр сийиэстэрэ буолуоҕа. Кинилэргэ анаан аахсыйалаах уопсастыба управлениетыгар (Дьокуускай к.) үөрэх тэриллиэҕэ.
“Саханефтегазсбыт” АУо генеральнай дириэктэрэ, СӨ норуодунай дьокутаата Виктор Лебедев эппитинэн, үлэһиттэр идэлэрин таһымын үрдэтэр сорукка өрүү сүрүн болҕомто ууруллар. Бу үлэ-хамнас эрэ ирдэбилэ буолбакка, үлэһиттэр идэлэригэр таһымнарын үрдэтэллэригэр, салгыы үүнэллэригэр-сайдалларыгар дьоһун кыаҕы биэрэр.
– Биһиги исписэлиистэрбит сыл аайы дойду үрдүк үөрэҕин бастыҥ кыһаларыгар, производственнай тэрилтэлэригэр үөрэнэ, стажировкалана бараллар. Былырыын филиаллар дириэктэрдэрин 3-с сийиэһин чэрчитинэн сэминээрдэри саҥа көрүҥүнэн ыыппыппыт. Ол курдук, Москубаттан уонна Санкт-Петербуртан эспиэр-преподавателлэр кыттыылаах үөрэх манна, Дьокуускайга буолбута, – диэн генеральнай дириэктэр кэпсээтэ. “Инникитин да үлэһиттэр кэмпитиэнсийэлэрин үрдэтии “Саханефтегазсбыт” АУо үлэтин-хамнаһын биир сүрүн соруга буолуо” диэн, генеральнай дириэктэр эрэннэрдэ.
