Өрөспүүбүлүкэбит доҕордуу дойдуну Узбекистаны кытта сыһыана инникитин туризымынан эрэ муҥурданыа суоҕа, атыы-эргиэн, үөрэх уонна култуура, успуорт уонна мэдиссиинэ өттүгэр эмиэ үлэлэһиэхтэрэ.
Ол туһунан Дьокуускайга Узбекистан туризымҥа кыаҕын биһирэмигэр вице-премьер Анатолий Семенов кэпсээтэ. Кини этэринэн, Узбекистаны кытта тас эргинии кээмэйэ ааспыт сылга 2 мөл. дуолларга тиийбит уонна өссө да улаатар чинчилээх.
«Ааспыт сылга Узбекистаҥҥа тас дойдуттан 10,2 мөл киһи, ол иһигэр 850 тыһ. РФ олохтооҕо, кэлэн сынньанан барбыттара. Быйыл Арассыыйаттан мөлүйүөнтэн элбэх турист кэлэрин күүтэбит. Ол эбэтэр, РФ куораттарыгар сэттиэлэҕэ 280 эриэйсэ көтөр», — диэн кини билиһиннэрдэ.
Оттон Узбекистан Владивосток куоракка генеральнай консула Юсуп Кабулжанов үөрэх, мэдиссиинэ, атыы-эргиэн өттүгэр үлэлэһии үтүө түмүктээх буолуоҕар эрэллээҕин биллэрдэ. Дэлэгээссийэ кыттыылаахтара маны сэргэ логистиканы тупсаран табаары эргитиини улаатыннарар туһунан кэпсэтиэхтэрэ.
