Социальнай пуонда Саха сиринээҕи салаата 23 471 оҕолоох 9070 киһиэхэ сыл аайы көрүллэр дьиэ кэргэн төлөбүрүн ыытта. Ол туһунан отделение салайааччыта Марина Герман мунньахха эттэ.
“Регламеҥҥа сурулларынан, киирбит сайаапка 10 үлэ күнүн иһинэн быһаарыллар, өссө 5 күн харчыны ыытарга барар. Наада тириир түгэнигэр, сайаапканы көрүү болдьоҕо 20 күн уһаан биэриэн сөп. Оҕолоох төрөппүттэр босуобуйаны ыларга Социальнай пуондаҕа эбэтэр МФЦ-га тиийиэхтэрин, “Госуслуги” порталынан сайабылыанньа ыытыахтарын сөп. Сыл аайы көрүллэр дьиэ кэргэн төлөбүрүн сайабылыанньатын бу сыл балаҕан ыйын 30 күнүгэр диэри тутабыт. Төлөбүрү ыларга үксүгэр сайабылыанньа эрэ ирдэнэр. Атын докумуонун исписэлиистэр бэйэлэрэ хомуйан бэрэбиэркэлииллэр”, – диэн Марина Герман быһаарда.
Ол да буоллар, кэккэ докумуону төрөппүттэр бэйэлэрэ аҕалыахтаахтар. Холобур, ис дьыала, федеральнай куттал суох буолуутун, судаарыстыбаннай харабыл уорганнарыгар үлэлиир дьон дохуоттарын туһунан ыспыраапканы.
Дьиэ кэргэн төлөбүрэ 18-тан 23-гэр (очно үөрэнэр) диэри саастаах иккиттэн элбэх оҕолоох, 2025 с. дохуот нолуогун (НДФЛ) төлөөбүт, үлэлиир төрөппүттэргэ ананар. Сайабылыанньаны ыыппыт киһи уонна кини оҕолоро Арассыыйа олохтооҕо буолуохтаахтар. Төлөбүр ананарыгар дьиэ кэргэн дохуота уонна баайа-дуола – барыта учуоттанар.
Сиһилии Социальнай пуонда кэлим нүөмэригэр эрийэн билсиэххэ сөп: 8-800-100-00-01 (эрийии төлөбүрэ суох).
