Владивосток куоракка ыытыллыбыт Илиҥҥи экэниэмикэ форумугар (ВЭФ) Саха сирэ 32 сөбүлэҥи түһэристэ. Бу туһунан өрөспүүбүлүкэ бэрэссэдээтэлин эбээһинэһин толорооччу Владимир Солодов иһитиннэрдэ.
“Мин, бырабыыталыстыба салайааччытын быһыытынан, форум түмүктэриттэн астынным. Форум түмүгүнэн олус наадалаах хайысхаларга уопсайа 32 сөбүлэҥи түһэристибит”, — диэтэ премьер. Кини ордук Бүлүү сүнньүгэр энергетиканы тупсарыыга 4 млрд солк. тахса солк. угарга ДВУЭК сөбүлэспитин уонна үрдүк технологияны сайыннарар пуондаҕа Внешэкономбааны кытары бииргэ һлэлэһии ситиһиллибитин бэлиэтээтэ.
Үрдүкү технологияларга сыһыаннаан, Солодов этэринэн, өрөспүүбүлүкэ лиидэрдии көрүүтэ ВЭФ манна сыһыаннаах сиэссийэлэригэр барытыгар бэлиэтэммит: “Биһиги чахчы да Уһук Илиҥҥэ IT-салааны сайыннарыыга инники күөҥҥэ сылдьар эбиппит. Ол да буоллар, биир сиргэ туран хаалбакка, салгыы иннибит диэки эрэллээхтик хардыылыыбыт. Онуоха Илиҥҥи экэниэмикэ форумугар ситиһиллибит сөбүлэҥнэр төһүү буолаллар”, — диэтэ Солодов.
Кини маны таһынан Госсовекка эрэгийиэн салайааччыта Айсен Николаев хас да тыын суолталаах боппуруостары көтөхпүтүн эттэ. Ол иһигэр бүддьүөт ороскуотун индексэтин туһунан. Бу индексэнэн эрэгийиэннэргэ доруобуйа харыстабыла үбүлэнэр. Маны таһынан, Айсен Николаев онкокиин уонна кардиология киинин тутуутун көтөхпүт. “Ити боппуруостар Владимир Путин таһымыгар көтөҕүлүннүлэр, инньэ гынан сотору кэминэн боппуруос үчүгэйдик быһаарыллыа диэн эрэллээхпит”, — диир Владимир Солодов.
“Хас биирдии судаарыстыбаннай бырагыраамаларга Уһук Илиҥҥэ үбүлээһини тыырыы 5,5%-тан кыраны ылыа суохтаахтар диэн этии баһылыыр суолталанна. Маннык дьаһалы дойду үбүн миниистиригэр Владимир Путин биэрдэ. Инньэ гынан, бу механизм сотору кэминэн үлэлээн барыаҕа диэн эрэллээхпит”, — диэтэ премьер.
