Ил Дархан Айсен Николаев үүнэр сылга суол тутуутугар федеральнай уонна эрэгийиэннээҕи бырагыраамалары олоххо киллэрии былааннарын кытары билиһиннэрдэ.
Айсен Николаев кэлиҥҥи сылларга федеральнай суоллары тутуу тэтимэ күүһүрбүтүн бэлиэтээтэ. Ол курдук, “Лена” суол түмүктэнэн эрэрин уонна “Бүлүү”, “Халыма” трассата тутулла турарын сырдатта. Ону таһынан, дойду бэрэсидьиэнэ Владимир Путин ыам ыйынааҕы ыйааҕар 2024 сылга диэри ситиһиллиэхтээх 12 соругун санатта.
“Мантан биирдэстэрэ эрэгийиэннэр уонна дойду киин субъектарын суолларын тутууга туһуланар. Биһиги номнуо үлэбитин саҕалаатыбыт. Өрөспүүбүлүкэ суолларын тутууга үүнэр сылтан саҕалаан алта сылга федеральнай бүддьүөттэн 17 млрд. солк., онтон Дьокуускай куорат суолларын тутууга 3 млрд.солк. үп көрүллүөҕэ. Бу күҥҥэ Уус Майдаҕа диэри “Амма” суола бүтэн эрэр. Маны таһынан, “Кэбээйи”, “Умнас”, “Дьааҥы” уонна да атын суоллар оҥоһуллаллара былааннанар”,— диэн Айсен Николаев иһитиннэрдэ.
Ил Дархан кэлэр сылларга массыына суолун тутуутугар киин куорат бүддьүөтүттэн сыл аайы 500 мөл. солк. үп көрүллэрин туһунан эттэ. Ону таһынан, федеральнай уонна өрөспүүбүлүкэ бүддьүөтүттэн сыл аайы 500 мөл. солк. үп тыырыллыаҕа. Киин куорат суолларын тутуутугар уопсайа сыл аайы 1,5 млрд. солк. үп көрүллүөҕэ.
“Ааспыт алта сылга Дьокуускайга 80 км суол тутулунна. Бүддьүөт көрүлүннэҕинэ уонна үчүгэй үлэлээх бэдэрээччиттэр ылыстахтарына үлэ хаамыыта өссө тэтимириэ. Кэлэр сылга улахан болҕомто Хатыҥ Үрэх суолун тутуутугар ууруллар. 2020 сылга Окружной суола оҥоһуллуо, бу күҥҥэ суол Тутуу ырыынагар диэри тиийдэ. Түөрт балаһалаах кэҥээбит суол Бүлүүлүүр аартыкка тиийиэ. Өссө да элбэх суол оҥоһуллара былааҥҥа баар. Инньэ гынан, бу бырагыраама үлэлээтэҕинэ киин куорат уонна улуустааҕы суоллар биллэ тупсуохтара”, – диэн Ил Дархан иһитиннэрдэ.
