Арассыыйа үрдүнэн хаарбах дьиэни көһөрүүгэ 400 млрд солк. көрүллүбүтүттэн 15% Саха сиригэр бэриллиэҕэ. Бу туһунан Ил Дархан Айсен Николаев иһитиннэрбитин пресс-сулууспата тиэрдэр.
“Саха сирэ 2024 сылга диэри 920 тыһ. кв. м. хаарбах дьиэни көһөрүөҕэ, маныаха Владимир Путин быһаарыытынан, дойдуга көрүллүбүт 400 млрд. солк. биһиги 15% ылыахпыт ”, – диэн Ил Дархан ДьУОХХ мунньаҕар эттэ. Мунньахха ДьУОХХ уларыта тутууга Пуонда кэтээн көрөр сэбиэтин бэрэссэдээтэлэ Сергей Степашин уонна ДьУоХХ Пуондатын генеральнай дириэктэрэ Константин Цицин кыттыннылар.
“Саха сирэ дойду атын эрэгийиэннэринээҕэр хаарбах дьиэттэн гражданнары көһөрөргө саамай улахан эппиэтинэһи сүктэ. Эһиги эрэгийиэҥҥит саамай улахан сайаапканы түһэрбитэ. Дойду үрдүнэн гражданнары хаарбах дьиэттэн көһөрүүгэ анаан 400 млрд солк. көрүллүбүтэ”, – диэн Степашин бэлиэтээтэ.
Хаарбах дьиэттэн көһөрүү 5 сыллаах анал бырагыраама эһиилгиттэн саҕаланыаҕа. Бу бырагыраама бастакы хампаанньатыгар 477 кв. м. көһөрүллүөхтээҕиттэн 4 тыһ. курдугу көһөрөллөрө хаалбыт. Бастакы хампаанньаҕа болдьоххо уонна хаачыстыбаҕа улахан боппуруостар ыйаммыт буоланнар, кэлэр хампаанньа кытаанах хонтуруолга ылыллан ыытыллыаҕа диэн Ил Дархан этэр.
