Үөһээ Муунатааҕы аһаҕас ньыманан алмааһы хостуур сиргэ булуллубут бастакы улахан алмааска “Өлөөн” диэн ааты иҥэрдилэр. Үөһээ Муунатааҕы алмаастаах сир Өлөөн национальнай эбэҥки улууһугар хостонор. Бу туһунан АЛРОСА хампаанньа пресс-сулууспата иһитиннэрэр.
Хампаанньа генеральнай дириэктэрэ Сергей Иванов “алмааска улуус аатын иҥэриигэ, бастатан туран, Үөһээ Муунаны арыйыыга өссө 50-с сылларга олохтоох нэһилиэнньэ үтүөтүн, өҥөтүн учуоттаатыбыт. Ону таһынан улууска ытыктабыл бэлиэтин алмаас тааһыгар үйэтиттибит”. Билигин бу бөдөҥ алмааһы “Бриллианты Алроса” кырыылыыр тэрилтэҕэ биэрэн биир эбэтэр хас эмэ бирилийээни кырыылыахтара. “Өлөөн” алмаас 51,49 карат ыйааһыннаах, кээмэйэ – 23х22х15 мм. Быһа холоон күндү таас 350 мөл. сылтан үрдүк саастаах.
Санатар буоллаха, Үөһээ Муунатааҕы алмааһы хостуур сири официальнайдык бу сыл алтынньы 31 күнүгэр арыйбыттара. Хампаанньа Өлөөн улууһугар сыл ахсын 100 мөл. солк. социальнай бырайыактары олоххо киллэрэргэ аныаҕа.
