Саха Өрөспүүбүлүкэтин Бырабыыталыстыбатын уочараттаах мунньаҕар 2018 сыл үһүс кыбартаалыгар тииһинэн олоруу алын кээмэйэ бигэргэннэ. Бу туһунан бырабыыталыстыба пресс-сулууспата иһитиннэрэр.
Саха сиригэр бу сыл үһүс кыбартаалыгар тииһинэн олоруу алын кээмэйэ биир киһиэхэ оннунан хаалла уонна 16 463 солк. тэҥнэстэ, үлэлиир киһиэхэ – 17 475 солк., биэнсийэлээхтэргэ – 13 242 солк., оҕолорго – 16 846 солк.
Тииһинэн олоруу алын кээмэйин судаарыстыбаннай ыстатыыстыка федеральнай сулууспатын Саха сиринээҕи салаата үһүс кыбартаалга бородуукта сыанатын үөрэппит дааннайдарыгар тирэҕирэн быстылар. Ол курдук, Саха сиригэр бородуукта сыаната быһа холоон иккис кыбартааллааҕар 3 солк. түһэн, 7 298 солк. тэҥнэспит.
Ордук сыаналаах бородуукта нобуора Зырянкаҕа – 10 296 солк. бэлиэтэммит, оттон саамай удамыр – Нерюнгрига – 6 325 солк. Сыана түһүүтэ Мииринэйгэ (1,2%), Нерюнгрига (1,1%), Удачнайга, Айхалга (1,1%), Өлүөхүмэҕэ (0,3%) бэлиэтэммит. Оттон сыана үрдээһинэ — Зырянкаҕа (4,4 %) уонна Бүлүүгэ (1,1 %).
Ортотунан нэһилиэнньэ дууһатыгар туттуллар (непродовольственный) табаар 0,3 %-нан үрдээн, 3 661 солк. тэҥнэспит. Төлөбүрдээх өҥө 0,2 % чэпчээн, 4400 солк. тэҥнэспит.
