Сэтинньи 21 күнүгэр, Арассыыйатааҕы федеральнай нолуок сулууспатын Саха сиринээҕи 5 №-дээх Оройуоннар икки ардыларынааҕы инспекциятын начальнига Владимир Степанович Тихонов суруналыыстары кытта көрүстэ.
Хамсаабат баай, тыа хаһаайыстыбатын нолуогар уларыйыылар, урбаанньыттар төлүүр страховой усунуостарын уонна аһаҕас аан күннэрин туһунан иһитиннэрдэ.
Ол курдук, хамсаабат баай нолуога урукку сылларга инвентаризационнай сыананан ааҕыллар эбит буоллаҕына, 2017 сыллаах нолуок кадастровай сыананан ааҕыллыа. Саҥа киллэрии сүрүн уратыта -- дьиэ-уот кадастровай сыаната ырыынак сыанатыгар чугаһа буолар.
Кадастровай сыананан ааҕыыга кыччатыллыбыт коэффициеннар туттуллуохтара:
- Хос 10 кв.м.
- Кыбартыыра 20 кв.м.
- Олорор дьиэ 50 кв.м.
Нолуок уоргана бу уларыйыылары нолуок төлөөччүлэргэ иһитиннэриитэ суох аптамаат быһыытынан ааҕыа. Онон нолуок уорганыгар кэлэ сылдьар наадата суох.
Сир нолуогар эмиэ уларыйыылар киирдилэр. Ол курдук, биэнсийэлээхтэргэ, I, II группалаах инбэлииттэргэ, Аҕа дойду сэриитин кыттыылаахтарыгар, Сэбиэскэй Сойуус, АФ Дьоруойдарыгар уо.д.а. льгота баар буолуоҕа. Холобур, сир иэнэ 600 кв.м. кыра буоллаҕына нолуок төлөммөт.
Тыраанспар нолуогар сыаналаах массыыналарга уларыйыылар киирдилэр. Социальнай ситимнэргэ бу сылтан тыраанспар нолуога суох буоларын туһунан иһитиннэрии тарҕаммыта. Арассыыйатааҕы федеральнай нолуок сулууспатын Саха сиринээҕи 5 №-дээх Оройуоннар икки ардыларынааҕы инспекцията иһитиннэрбитинэн, маннык сурах төрүтэ суох. Тыраанспар нолуогун суох оҥорор туһунан сокуоҥҥа уларыйыылар киирэ иликтэр. Онон, тыраанспардаах дьон сылга биирдэ нолуок төлүөхтээхтэр.
Нолуок уорганын саайтыгар www.nalog.ru личнай кабинекка ааҕыллыбыт нолуогу көрүөххэ сөп.
Хамсаабат баай 2017 сыллаах нолуога 2018 сыл ахсынньы 1 күнүгэр диэри төлөнүөхтээх.
2019 сыл тохсунньу 1 күнүттэн тыа хаһаайыстыбатын нолуогун төлөөччүлэр “НДС” төлүүр буолуохтара.
Урбаанньыттар төлүүр чопчу ыйыллыбыт усунуостара икки чааска арахсар:
- Дохуоттан тутулуга суох булгуччу төлөнөр усунуос
- Дохуот 300 тыһ.солк. үрдүк буоллаҕына 1 % төлөнөр
Урбаанньыт үлэтин ыыппат буоллаҕына страховой усунуоһу төлөөмүөн сөп. Өскөтүн 1,5 диэри саастаах оҕотун, 80 сааһыттан үөһэ саастаах кырдьаҕаһы, инбэлиит оҕону эбэтэр 1 группалаах инбэлиити көрөн олорор эбэтэр байыаннай сулууспаҕа сылдьар буоллаҕына.
2018 сыллаах төлөбүр болдьоҕо:
- Булгуччу төлөнөр усунуос ахсынньы 31 күнүгэр диэри төлөнүөхтээх.
Булгуччу төлөнөр пенсионнай страховка суумата сылга - 26 545 солк.
Булгуччу төлөнөр мэдэссиинэ страхкатын суумата сылга – 5840 солк.
Дуохуот 300 тыһ.солк. үрдүк буоллаҕына төлөнөр 1 % от ыйын 1 күнүгэр диэри төлөнүөхтээх.
Арассыыйатааҕы федеральнай нолуок сулууспатын Саха сиринээҕи 5-с №-дээх Оройуоннар икки ардыларынааҕы инспекцията, сэтинньи 24 күнүгэр 10.00-15.00 ч аһаҕас аан күннэрин ыытар. Аадырыһа: 202 мкр. 23-с куорпус.
