Таатта улууһун Даайа Амматын олохтооҕо Петр Белолюбскай ыаммыт үүтүнэн мороженай оҥорон нэһилиэгэр хамаҕатык атыылыыр.
Сөбүгэр сыаналаах уонна минньигэс бэйэ оҥоһуу мороженайын дьон хамаҕатык атыылаһар. Ордук оҕолор бэйэ ынаҕыттан ыаммыт үүттэн оҥоһуллубут мороженайы амсайаары уочаракка үмүөрүһэллэр. “Наһаа минньигэс, үчүгэй амтаннаах, дьиҥнээх мороженай!”, – дэһэллэр.
Петр Белолюбскай бу мороженайын үс сылтан бэттэх оҥорон атыылыыр. Билиҥҥитэ биир үлэһиттээх. Өссө кыаҕын ылара буоллар, бородууксуйатын элбэтэн, атыытын көдьүүһэ улаатыа эбит.
“Былырыыҥҥыттан син маҕаһыыннарынан тарҕаттыбыт. Куорат сорох маҕаһыыннарыгар эмиэ атыылаан эрэбит. Сотору атахпытыгар туран, улахан сыаҕы арыйар былааннаахпыт”, – диир Петр Белоюбскай.
Белолюбскайдар 2002 сылтан Даайа Амматыгар дьиэ-уот атыылаһан, сүөһү-ас тутан, билигин бааһынай хаһаайыстыбалаахтар. Онон үрүҥ илгэни үрүлүтэн, ону сыа-сым курдук тутан, олохтоох бородууксуйаны үксэтэллэр.
