Ил Түмэн тыа сиригэр уонна аграрнай бэлиитикэҕэ сис кэмитиэтигэр (бэрэссэдээтэл Андрей Находкин) бүгүн, ахсынньы 5 күнүгэр бырабыыталыстыбаҕа үүккэ субсидияны 800 тыһ. солк. диэри эбии улаатыннарары туруорсан этии киллэрдилэр.
Мунньахха кэмитиэт чилиэннэрэ Василий Местников, Алексей Еремеев, Иван Слепцов, Петр Аммосов, Мария Христофорова, Иван Андреев, Гаврил Алексеев, Руслан Федотов, бырабыыталыстыба бэрэссэдээтэлин солбуйааччы Денис Белозеров, тыа хаһаайыстыбатын миниистирэ Александр Алексеев, министиэристибэлэр уонна биэдэмэстибэлэр бэрэстэбиитэллэрэ, өрөспүүбүлүкэ Ааҕар-суоттуур палататын аудитора кытыннылар.
Иккис ааҕыыга өрөспүүбүлүкэ кэлэр сыллаах уонна 2021-2022 сс. туһуламмыт бүддьүөтүн көрүүгэ бэлэмнэнэн, дьокутааттар “Развитие сельского хозяйства и регулирование рынков сельскохозяйственной продукции, сырья и продовольствия на 2020-2024 годы" уонна "Комплексное развитие сельских территорий на 2020-2025 годы" судаарыстыбаннай бырагыраамаларга уларытыыны киллэрэр туһунан дьүүллэстилэр. Ол курдук, сүрүннээн үүт аһын бэлэмнииргэ судаарыстыбаннай көмөнү 35 солкуобайтан 45 солкуобайга диэри улаатыннарар туһунан көрдүлэр.
Тыа хаһаайыстыбатын миниистирэ Александр Атласов иһитиннэрбитинэн, эһиилги бүддьүөккэ эбии 2 млрд 800 мөл. солк. көрбүттэр. Сыллааҕы былаан – 80 тыһ. туонна үүт (1 лиитирэтин 35 солк. суоттаммыттар). Миниистир этэринэн, үһүс сылын 100тэн тахса төбөлөөх тэриллиилээх хаһаайыстыбалары өйүүргэ анал хос бырагыраама үлэлиир. Эһиилгиттэн 25-тэн ордук төбөлөөх бары бааһынай хаһаайыстыбаларга (көрүҥүттэн тутулуга суох) субсидия көрүллүөхтээх. Онуоха 390 мөл. солк. бүддьүөккэ эбии көрбүттэр. Инньэ гынан, тыа хаһаайыстыбатын бородууксуйатын оҥорон таһаарааччыларга эбии көмө оҥоһуллуохтаах.
Зампред Денис Белозеров “төһө да бүддьүөт олус уустугун иһин, биһиги баар бырагырааманы тутан хааллыбыт. Төрдүс сылын тэриллиилээх хаһаайыстыбаларга эбии харчы көрөбүт. «Развитие сельского хозяйства и регулирование рынков сельскохозяйственной продукции, сырья и продовольствия на 2020-2024 годы» бырагыраама иитинэн 5 солк. диэри субсидияны үрдэтэр туһунан эттэххэ — ити олох кыаллыбат. Итинник дьаһаннахпытына, биһиги төрүт хаһаайыстыбаҕа, үүнээйигэ, мелиорацияҕа сыһыаннаах харчыбытын ылан быраҕарга күһэллиэхпит” диэтэ.
Гаврил Алексеев 25 төбөттөн үөһээ сүөһүлээх хаһаайыстыбаларга көрүллэр 390 мөл. солкуобайы үүккэ көрүллэр субсидияны 5 солк. диэри улаатыннарарга угуохха диир. Маныаха субсидияны туһанааччылары бородууксуйаны үрдэтэллэрин хонтуруоллуур наадатын эттэ.
Кэмитиэт чилиэннэрэ бары эһиилги сыллаах үүккэ былааны толороллоругар 5 солк. диэри (35 солк. 40 солк.диэри) субсидия харчытын үрдэтэри туруорустулар уонна бүддьүөттэн эбии 800 тыһ. солк. көрөллөрүгэр эттилэр. Дьокутааттар бары да “Үүт харчытын хаһан үрдэтэҕит?” диэн этиннилэр. Мария Христофорова “эһиги киллэрэр саҥа этиилэргит уопсай стратегия, бу секторы сайыннарар идеология эрэ баар буоллаҕына табыллар” диэн тоһоҕолоото. Кэмитиэт бэрэссэдээтэлэ Андрей Находкин сарсын бүддьүөт кэмитиэтигэр ити этиллибит 800 тыһ. солк. көрөллөрүн туруорсарын туһунан эттэ.
