“Земский доктор” бырагыраамма төлөбүрүн нолуоктан босхолууру көрүөхтэрэ

Үп министиэристибэтэ “Земский доктор” бырагыраамма төлөбүрүн нолуоктан (НДФЛ) босхолуур туһунан сокуон бырайыагын бэлэмниир. Бу туһунан “Парламентская газета” хаһыакка суруйаллар.

Дойду бэрэсидьиэнэ Владимир Путин бырабыыталыстыбаҕа, “Земский доктор” бырагыраамманан үлэлии сылдьар быраастары нолуоктан (НДФЛ) босхолуур туһунан сокуоҥҥа көннөрүүлэри киллэрэргэ сорудах биэрбитэ. Бу бырагыраамма чэрчитинэн куораттыҥы тииптээх бөһүөлэктэргэ уонна 50 тыһ нэһилиэнньэлээх куораттарга үлэлии тиийбит мэдиссиинэ үлэһиттэрэ 1 мөл солк, оттон фельдшердэр 500 тыһ солк ылаллар.

Владимир Путин олунньу 27 күнүгэр буолбут мунньахха, миэдиктэр ылар төлөбүрдэриттэн НДФЛ төлөөн илиилэригэр 870 тыһ солк, оттон фельдшердэр 435 тыһ солк ылалларын бэлиэтээтэ. Инньэ гынан, бэриллэр төлөбүргэ нолуок сууматын эбэр эбэтэр нолуоктан босхолуур туһунан этии киллэрдэ. Үп миниистирэ Антон Силуанов  бу этиини өйөөтө.