Тохсунньу 28 күнүгэр Ил Дархан Айсен Николаев “О единовременной выплате отдельным категориям граждан в связи с 75-й годовщиной Победы в Великой Отечественной войне 1941-1945 годов” диэн ыйаахха илии баттаата. Ыйаах чэрчитинэн Аҕа дойду сэриитин оҕолоро (1945 сыл балаҕан ыйын 3 күнүгэр сокуоннай саастарын сиппэтэх буолуохтаахтар) аан бастакытын 3 тыһ солк көмө харчыны ылыахтара.
Аҕа дойду сэриитин кэмигэр төрөөбүт дьон билигин 70-тан тахса саастаахтар. Биллэн турар, судаарыстыба көмөтүгэр наадыйаллар. Федеральнайтан уонна өрөспүүбүлүкэттэн көрүллэр социальнай көмөлөр кэмигэр уонна толору бэриллэллэр. Ону таһынан, Ил Дархан Айсен Николаев Улуу Кыайыы 75 сыллаах үбүлүөйүнэн, сэрии оҕолоругар биирдэ бэриллэр төлөбүр туһунан ыйаахха илии баттаата.
СӨ үлэҕэ уонна социальнай сайдыыга министиэристибэтин пресс-сулууспата иһитиннэрбитинэн, бу күҥҥэ өрөспүүбүлүкэҕэ 81 сэрии кыттыылааҕа, Ленинград блокадатын 27 олохтооҕо, 691 сэрии огдообото, 4850 тыыл бэтэрээнэ уонна 12586 “сэрии оҕото” бааллар.
Быйыл дойду Улуу Кыайыы 75 сыллаах үбүлүөйүн бэлиэтиир. Арассыыйаҕа бу сыл өйдөбүл уонна албан аат сылынан биллэрилиннэ. Оттон Саха сиригэр – Дойдунаат сыла.
