Саха сирин былаастара короновирус суоһаан, Уһук Илиҥҥэ кыраныысса сабыллан, Кытайтан киирэр фрукта, оҕуруот аһа аччаан, кууһунан атыылааччылар сыананы үрдэппэттэрин кэтээн көрөр, хонтуруоллуох буолан эрэннэрбиттэрэ. Ити туһунан баар СМИ бары суруйда, Ил Дархаммыт социальнай ситимнэринэн эттэ-тыынна. “Саха оту-маһы сиэбэт, эт-үүт астаах үйэлэри туораан кэлбиппит” диэн түөспүтүгэр охсунабыт. Онон Кытайдар үнтү химия суурадаһыннаах астара кэлбэтэҕинэ да, улаханнык сүүйтэриэ суох курдукпут.
Былаастар оҕуруот аһын, фрукта сыаната үрдүүрүн хонтуруоллууллара биллэн турар үчүгэй. Ол эрээри, Дьокуускай куоракка, ордук икки бырыһыаннаах ипотеканы биэрэр буолуохтарыттан ыла, дьиэбит сыаната олус үрдээтэ. Хата, бу ырыынагы сааһылаан, сыана бас-баттах барбатын хонтуруоллууллара буоллар, саха дьонугар көдьүүһэ ордук буолуох эбит.
2018 сыллаахха Дьокуускайга дьиэ биир кв.м. сыаната ортотунан 76223 солк. тэҥ этэ. Инньэ гынан, Дьокуускай үрдүк сыаналаах дьиэлэринэн дойдуга 12-с миэстэҕэ турара. Былырыын дьиэ сыаната 66 тыһ. солк. саҕалаан 110 тыһ. солк.дылы халбаҥныыра. Оттон билигин дьиэ сыаната үрдээн аҕай турар кэмэ. Холобур, саҥа тутуллубут дьиэҕэ (первычный рынок) билигин куорат тутуу хампаанньалара биир хостоох (36 кв.м.) кыбартыыра ортотунан 3 мөл.200 тыһ. солк. турар, ол эбэтэр биир кв. м 88 тыһ. солк.
Онтубут да өрөмүөнэ суох, хараннан көрөн турар дьиэҕэ. Оттон иккис ырыынакка (бэлэм тутуллубут, киир да олор дьиэҕэ) биир хостооҕу номнуо кв.м. иһин 96- 100 тыһ. солк. көрдүүр буолбуттар (оройуонуттан эҥин көрөн). Оттон ыт уйатын саҕа студия кыбартыыралар 87 тыһ. солк. кыраҕа суохтар. Ордук хоту дьиэ иккис ырыынакка үрдүк.
Икки хостоох кыбартыыра иһин ортотунан – 84 тыһ. солк., үс хостооххо – 79 тыһ. солк. көрдүүллэр. Билигин бааннар ипотеканы хамаҕатык биэрэр буоланнар, атыыланар дьиэ да аҕыйаабыт, былдьаһык буолбут. Ол тухары сыана үрдүү турар. Этэргэ дылы, “спрос баар буоллаҕына, сыана үрдүү турар”.
Риелтордар этэллэринэн, бу нэдиэлэҕэ биир хостоох кыбартыыраҕа сыана ортотунан 1677 солк. үрдээбит. Билигин иккис ырыынакка уопсайа 1600 кэриҥэ кыбартыыра атыыга турар, ити уопсайа 8,5 млрд солк. сыаналаах. Биллэн турар, судаарыстыба бүддьүөттэн тутуллубут эрэ сыананы орооһон хонтуруоллуон сөп, онтон атынын тутуу хампаанньалара, кыбартыыра хаһаайыттара бэйэлэрэ билэллэринэн сыананы быһаллар. Ол эрээри, манна былаас болҕомтотун ууруон наада. Саха былыр да, аны да фрукта сиэбэккэ өлбүтэ диэн суох, оттон дьиэ сыаната үйэ тухары барыбытын долгутар тыын боппуруос. Онон буоларга-буолбакка болҕомтону ууран пиардаммакка, дьиҥ норуот кыһалҕатыгар болҕомтону уурар уолдьаста курдук.
