Kyym.ru “Саха сүөһүтэ” хааһына тэрилтэтэ Сүлдьүкээргэ 2020-2021 сс. кыстыкка аныгылыы ирдэбилгэ толору эппиэттиир 200 саха сүөһүтэ кыстыыр хотонун туттарар. Тутууну “Туймаада” ФАПК ыытар, үбэ-харчыта бүдьүөттэн быһаарыллынна.
Бу күннэргэ СӨ Бырабыыталыстыбатын бэрэссэдээтэлин солбуйааччы Д.Г. Белозеров, АЛРОСА вице-бэрэсидьиэнэ А.П. Дьячковскай, т/х миниистирэ А.П. Атласов, “Туймаада” ФАПК салайааччыта П.С. Ефремов, Мииринэй уокуругуттан дьокутаат Ю. М. Николаев уонна хааһына тэрилтэтин салайааччы А.Е. Артемьев кыттыылаах араас таһымнаах мунньахтар ыытылыннылар. Ити быһаарыылаах мунньахтар түмүктэринэн, тутуу сирэ быһаарылынна, сирин бырайыактыыр-инженернай чинчийии оҥоһулунна. “Туймаада” ФАПК Сүлдьүкээр хотонун тутуутун матырыйаалларын муус устар ый 12 күнүнэн кыстык суолу баттаһа миэстэтигэр тириэртилэр.
Сүлдьүкээргэ массыына суолунан 175 т тутуу матырыйаала: цемент, металлоконструкция, сэндвич панеллар, стеклопакет түннүк тиэрдилиннэ, уопсайа 12,7 мөл солкуобайдаах үлэ ыытылынна.
Аны күһүн алмаастаах Мииринэйгэ саха сүөһүтүн саҥа, аныгы хотоно дьэндэйэригэр барыта бэлэм буолла.
Кырдьыгынан эттэххэ, эһии бэлиитикэтэ барыаҕыттан, саха сүөһүтэ барахсаҥҥа биир да саҥа хотон тутуллубатаҕа. Бастакы аныгы хотон Эбээн Бытантайга тутуллубута. Төрүт баайбытыгар киһилии сыһыан тиллиитэ өбүгэлэрбит кэриэс хаалларбыт сүөһүлэрэ түргэнник тэнийэригэр улахан төһүү буолуо.
Владимир Степанов.
