Хоруона вирустаах дьону эмтиир мэдиссиинэ үлэһиттэрэ эбии төлөбүр ылыахтара. Бу туһунан СИА-ҕа Ил Дархан Айсен Николаев иһитиннэрэр.
Ил Дархан социальнай ситимҥэ тарҕаммыт төлөбүр уһуурун туһунан сурах сымыйа буоларын эттэ. Санатар буоллахха, муус устар 8 күнүгэр дойду бэрэсидьиэнэ Владимир Путин бырабыыталыстыбаҕа, хоруона вирустаах дьону эмтиир мэдиссиинэ үлэһиттэригэр эбии төлөбүр биэрэр уонна атын социальнай льготаларынан хааччыйар туһунан сорудах биэрбитэ. Ааспыт нэдиэлэ бүтүүтэ бырабыыталыстыба бэрэссэдээтэлэ Михаил Мишустин 50 млрд солк үп көрүллүбүтүн туһунан дьаһалга илии баттаата.
Айсен Николаев иһитиннэрбитинэн, үбүлээһин харчыта бу нэдиэлэҕэ түспүт. “Дьокуускайга, Алдаҥҥа, Чаяндаҕа уонна Мииринэйгэ хоруона вируһунан ыалдьыбыт дьону эмтииргэ 120 миэдик үлэлиир. Оччо үлэһит обсерватордарга бааллар. Уопсайа 250 миэдик күн аайы олохторун, доруобуйалараны толук ууран туран үлэлииллэр. Кинилэр сөптөөх төлөбүрдэри ылыахтара”, — диэн Ил Дархан бэлиэтээн эттэ.
