Ил Дархан Айсен Николаев Эльгатааҕы чох хостуур холбоһук салалтатын – “А-Проперти” бас билээччи Альберт Авдоляны уонна “Управляюшая компания “Эльга Уголь” ХЭУо генеральнай дириэктэрэ Александр Исаевы – кытта көрсөн, тэрилтэ сайдар кэскилин дьүүллэстилэр.
130 млрд солк. инбэстииссийэ угуллуохтаах сайдыы бырагырааматын үлэлэтии түмүгэр, 2023 сылга тиийэн, хас сыл аайы хостонор чох кээмэйин 5-тэн 45 мөл. т диэри улаатыннарар, “Эльга-Улак” тимир суол таһаҕаһы таһар кыамтатын 30 мөл. т тиэрдэр, Ванино пуорт акваториятыгар сүөкүүр тутууну ыытарга суоттаналлар. Ону таһынан аныгы технологиялаах уонна экология ирдэбилигэр эппиэттиир хайа байытар кэмбинээтин тутууну былааннаабыттар. Александр Исаев бу бэс ыйыгар 500 тыһ. т чох хостоммутун, от ыйыгар – 650 тыһ. т суоттаналларын, алтынньыга тиийэн бу көрдөрүүнү 1 мөл. т тиэрдиэхтэрин иһитиннэрдэ. Ил Дархан ханнык хампаанньалар бу бырайыакка кытталларын ыйыталаспытыгар эр-биир ааҕан иһитиннэрдилэр. Олор истэригэр Арассыыйаҕа 2006 сылтан үлэлиир норуоттар икки ардыларынааҕы ESTA Construction хампаанньа баара ахтылынна. Бырайыагы салайыыга, эмиэ норуоттар икки ардыларынааҕы таһымнаах AECOM хампаанньа, оттон технологияны бырайыактааччынан уонна оборудованиены хааччыйааччынан Coralina Engineering инжиринговай хампаанньа анаммыт. Бу тэрилтэ Эльганы кытта 2012 сылтан үлэлиир.
Саҥа ХБК үлэлээтэҕинэ эрэгийиэн бүддьүөтүгэр үп киирэр, саҥа үлэ миэстэтэ тахсар, оттон уонна экология өттүнэн охсуута суох буолуоҕа диэн мэктиэлииллэр.
