Саха сирин Уһук Хоту сирдэриттэн 112 ыал дьиэ сэртипикээтин ылан атын сиргэ көһүөн сөп. Бу туһунан “Российская газета” суруйар.
Балаҕан ыйын 12 күнүттэн Уһук Хоту сирдэртэн дьиэ сэртипикээтин ылан көһөр бырааптаах дьон аны кэлэр икки сылга дылы маннык барааптарын уһатар туһунан уурааҕа сокуоннай күүһүгэр киирбит. Маннык уларытыы эрэгийиэн былаастара 2012 сыл тохсунньу 1 күнүгэр дылы хоту улуустарга саппыт нэһилиэнньэлээх пууннарын олохтоохторугар сыһыаннаах. Кинилэргэ федеральнай бүддьүөттэн 2020-22-022 сылларга кыбартыыра атыылаһалларыгар дьиэ сэртипикээтин биэриэхтэрэ. Онуоха кинилэр бастаан олохтоох былаастарга 2021 сыл ахсынньы 1 күнүгэр дылы туһааннаах сайабылыанньаны биэриэхтээхтэр, ол кэннэ боломуочуйалаах бааҥҥа тиийэн харчыларын түһэртэрэллэр.
