Госдуматтан Ил Дархаммыт Айсен Николаев кыстыыр үппүтүн булбутун туһунан үөрүүлээх сонун кэллэ. Айсен Сергеевич хоруона хамсыгын охсуутугар “АЛРОСА” алмааһын атыыта мөлтөөн, бүддьүөккэ киириитэ аҕыйыырын өтө көрөн, эрдэттэн дьаһанан, бэрэсидьиэн В.В.Путиҥҥа ГОХРАН дойду бүддьүөтүн суотугар АЛРОСА-ттан алмаас атыылаһарын көрдөһөн сурук киллэрбитэ. В.Путин “АЛРОСА”ны да, өрөспүүбүлүкэни да өйүөхтээхпит” диэн виза туруорбут.
РФ саҥа бырабыыталыстыбатын кытта үп-харчы кээмэйин быһаарсар үлэ ситэн, балаҕан ыйын 15 күнүгэр Госдума иккис ааҕыыга Гохран АЛРОСА-ттан алмааһы атыылаһарын элбэтэри көҥүллээтэ. Ил Дархан сайын кэпсэтии 0,5-1,0 млрд дуоллар суума туһунан барар диэбитэ.
Билигин хамсык тохтуох быһыыта суох, дойдуга харчы ыһылла сыппат. Ол эрээри, дойду салалтата саамай уһун, тымныы кыһыннаах Саха сирин кыһалҕатын өйдөөн өйөөбүтэ улахан махталлаах. Ону таһынан, бу улахан боппуруос быһаарылларыгар Ил Дархан дойду салалтатын кытта сатаан кэпсэтэрэ, олохтоохтук туруорсара улахан оруолламмыта чахчы. Ол туһунан, бэл, соҕуруу соцситимнэргэ “А.Николаев GR (бырабыыталыстыбаны кытта сыһыан) үрдүк” диэн бэлиэтээн суруйаллар.
