Бу күннэргэ дойду премьер-миниистирэ Михаил Мишустин 2024 сылга диэри 2035 сылы кыҥаан оҥоһуллубут Уһук Илин социальнай-экэнэмиичэскэй сайдыытын национальнай бырагырааматын бигэргэттэ.
Ол бырагыраамаҕа “Саха сирин экэнэмиичэскэй сайдыытын суол-иис суоҕа атахтыыр” диэн бэлиэтэммит. Ол курдук, өрөспүүбүлүкэ территориятын 20,9 эрэ бырыһыана сылы эргиччи суоллаах дэммит. Онон сибээстээн, 2024 сылга диэри Дьокуускай таһынан Өлүөнэни туоруур күргэ тутуллан бүтэр буолбут.
Санаттаахха, Өлүөнэ күргэтэ Дьокуускай таһынааҕы Эргэ Табаҕаттан Мэҥэ Хаҥалас улууһун Хаптаҕай бөһүөлэгэр диэри тутуллуохтаах. Тутуу бырайыагын атыытыгар (торг) “ВИС” уонна “РТ – развитие бизнеса” (“Ростех” судаарыстыба корпорациятын самалык тэрилтэтэ) – “Национальная инфраструктурная компания” диэн тэрилтэлэр холбоһуктара кыайбыта. “ВИС” күргэ бырайыагын 2020 сыл бүтүөр диэри түмүктүөх буолбута.
Барыллаан ааҕалларынан, күргэ сыаната 83,3 млрд сокл. буолуохтаах. Онтон 29 млрд солк. холбоһук, 6,4 млрд сокл. – Саха сирэ, 47,9 млрд солк. – федеральнай бүддьүөт уйунуохтаах.
Билиҥҥитэ күргэ федеральнай бүддьүөттэн үбүлэнэрэ-үбүлэммэтэ тиһэҕэр диэри биллэ илик. Ил Дархан Айсен Николаев ити боппуруос өтөр быһаарыллыа диир.
