Киир

Киир

Бэҕэһээ, сэтинньи 10 күнүгэр Ил Түмэн уочараттаах пленарнай мунньаҕар Ил Дархан “Саха өрөспүүбүлүкэтигэр нолуок бэлиитикэтин туһунан” диэн сокуон барылын ылыннылар. Саҥа сокуон тугу этэрий?

2021 сылтан ыла элбэх оҕолоох дьиэ кэргэн көлө нолуогун төлүүртэн босхолоноллор. Онуоха элбэх оҕолоох төрөппүт эбэтэр эппэкиин аатыгар биир көлө бэлиэтэммит буолуохтаах, кини онтон босхолонор.

Убатыллыбыт углерод гааһынан, компромировннайуонна убатыллыбыт айылҕа гааһынан барар тимир көлөлөөх юридическэй, физическэй сирэйдэр уонна урбаанньыттар көлө нолуогун аҥаарын төлүүр кыахтаналлар.

Уматыгы сапыраапкалыыр инфраструктураны сайыннарар тэрилтэлэр саҥа сапыраапкалыыр эбийиэги туталларыгар баай-дуол нолуогар нолуок ыстаапката нуулга тэҥнэһэр.

Арктика зонатыгар үлэлиир резиденнэргэ дохуот нолуога бастакы уон сылга 0 бырыһыаҥҥа тэҥнэһэр уонна кэлэр биэс сылга баай-дуол нолуогуттан босхолоноллор (2021-2025 сс).

Нолуоктан ылыы патентнай систиэмэтэ мантан ыла сүөһүнү иитиигэ уонна үүнээйиннэн дьаркытаныыга эмиэ киирэр.

Эрэгийиэннээҕи инвестиция бырайыагын (РИП) кыттыылаахтарыгар тэрилтэ дохуотугар нолуок ыстаапката үрдүүр. Саха сиригэр РИП ыстаатыһын 16 тэрилтэ ылар, олортон икки тэрилтэ чоҕу хостуур, атыттар – кыһыл көмүһү хостууллар. Бырайыагы олоххо киллэрэр бастакы биэс сылларыгар дохуот нолуога 0 бырыһыантан 10 бырыһыаҥҥа дылы үрдүүр. Онтон кэлэр биэс сылга – 10 бырыһыантан 13,5 бырыһыаҥҥа дылы үрдүүр.

ТОСЭР резиденнэригэр тэрилтэ баайын-дуолун нолуогар кэлэр 5 нолуок сылыгар кыччатыллыбыт нолуок ыстаапката киирэр – 1,1 бырыһыан. Бу иннинэ резиденнэр бастакы 5 сылларыгар нуул ыстаапка тутуһуллара.

Көлө нолуогун ыстаапкатын чопчулуохха сөп буолар. 2021 сыл иккис аҥаарыгар дьокутааттар бырабыыталыстыбаны кытары массыына сылыттан көрөн нолуок ыстаапкатын аччатарга сөбүлэстилэр.

Тарҕат:

Санааҕын суруй