Киир

Киир

2020 сылга Саха сирин бүддьүөтүгэр нолуоктан киирии 119 млрд солк. тэҥнэспит. Бу туһунан Ил Дархан уонна бырабыыталыстыба дьаһалтатын пресс-сулууспата сырдатар.

Ахсынньы 1 күнүгэр Ил Түмэн пленарнай мунньаҕар дьокутааттар бастакы ааҕыыга ааһан эрэр 2020 сылга өрөспүүбүлүкэ судаарыстыбаннай бүддьүөтүгэр уларытыылары киллэрэр туһунан сокуон барылын ылыннылар. Айсен Николаев сокуон барылыгар уларыйыы бастатан туран нолуокка киирии улааппытын кытары сибээстээх. “Биһиги бүддьүөппүтүгэр нолуоктан киирии ааспыт сыллааҕыны кытары холоотоххо улаатта. Былырыын 11 млрдж солк. этэ, оттон билигин 119 млрд солк. буолла. Төһө да кириисис, хоруона хамсыга сатыылаатар, алмаас бырамыысалыннаһыгар ыарахан кэм тосхойдар, биһиги бары источниктарбытын киллэрэн, нолуоктан киириини улаатыннардыбыт. Ити үчүгэй ситиһии”, - диэн Айсен Сергеевич эппит. Кини Путин быһаччы уурааҕынан, эрэгийиэннэр улахан көмөнү ылбыттарын бэлиэтээбит. “Былырыын 87 млрд солк. биэрбит эбит буоллахтарына, быйыл онтубут 125 млрд солк. дылы улаатта. Ол иһигэр федеральнай бүддьүөттэн үп киириитэ 40 млрд курдук улаатта. Соторутааҕыта дотацияҕа 80 млрд солк тыыралларыгар, бүддьүөти тэҥнээһиҥҥэ биһиги Уһук Илиҥҥэ саамай элбэх харчыга – балтараа миллиардка тигистибит. Биһиги 39 эрэгийиэҥҥэ киирсэн, ити харчыны ылыахтаахпытын дакаастаан ситистибит”, - диэбит Ил Дархан. Кини этэринэн, ити үп үөрэхтээһиҥҥэ, хомунаалынай комплексы субсидиялааһыҥҥа, санитарнай авиацияны үбүлээһиҥҥэ уонна хоруона хамсыгын бохсууга ыытыллыаҕа.

Тарҕат:

Санааҕын суруй