Эһиилгиттэн Саха сиригэр бүддьүөт эйгэтин үлэһиттэрин хамнаһа 3%-нан үрдүөҕэ.
Бу туһунан үлэ уонна социальнай сайдыы миниистирэ Елена Волкова бүгүн, ахсынньы 2 күнүгэр бырабыыталыстыба мунньаҕын кэмигэр эттэ.
“Путин “ыам ыйынаҕы ыйааҕыгар” хапсыбатах бүддьүөт эйгэтин үлэһитэрин хамнаһа 2021 сыл тохсунньу 1 күнүттэн 3 бырыһыанынан үрдүөҕэ”, - диэн хотун Волкова эттэ. Хамнас үрдээһинэ 37 тыһ. бүддьүөт эйгэтин үлэһиттэрин хаарыйыаҕа – бэтэринээрдэри, агрономнары, лесниктэри, инженердэри, суоппардары, повардары уо.д.а. кыра хамнастаахтары. Маныаха өрөспүүбүлүкэ бүддьүөтүттэн 739,8 мөл. солк. көрүллүбүт. Маны таһынан, МРОТ эһиилгиттэн бу сыллааҕар 5,5%-нан улаатар уонна 12 792 солк. тэҥнэһэр. Ол эбэтэр, “хотугу надбавка” эбиллэн, 1,7 коэффициеннаах улуустарга – 31 980 солк., оттон 2,0 коэффициеннаахтарга – 35818 солк. буолуоҕа. МРОТ улаатыыта 30 тыһ. кэриҥэ үлэһити хаарыйыаҕа. Онуоха 769 мөл. солк. көрүллүбүт.
