Киир

Киир

Ааспыт сылга “Бүлүү” уонна “Халыма” федеральнай суолларга 136 км тахса суолу өрөмүөннээтилэр уонна туттулар. Бу туһунан “Бүлүү” упрдор пресс-сулууспата иһитиннэрэр.

“Уопсайа 26 тутуу эбийиэгэ үлэҕэ киирдэ, 136 км суол хапытаалынай өрөмүөннэннэ уонна 859 м ускуустубаннай тутуу үлэҕэ киирдэ. Ол курдук, “Бүлүү” айан суолугар 115,7 км, ол иһигэр 12 км тутуу учаастага уонна саҥардан оҥоруу тигистэ. Алтынньыга Түүкээн үрэххэ 267 м усталаах күргэ уонна Аччыгый Ботуобуйаҕа 191 м усталаах саҥа күргэ тутулунна. Инньэ гынан 2007 сылтан пантон муостаннан олорбут суол быһаарыллан, сылы устата айанныырга кыах бэрилиннэ. Маны таһынан, Улахан Мугур уонна Саһар үрэхтэр муосталара саҥардылынна. 2020 сылтан 660-с км-гэ Бүлүү өрүһүн туоруур күргэ тутуутун үлэтэ саҕаламмыта. Күргэ уһуна – быһа холоон 1,7 км, оттон онно тиксии суола – 20 км. Бу “Бүлүү” айан суолугар саамай улахан күргэ буолуоҕа, ол тутулуннаҕына Ньурбаттан Дьокуускайга дылы сылы устата харгыһа суох сырыы олохтонуоҕа”, - диэн суруйаллар.

Оттон “Халыма” айан суолугар 21 км усталаах суолу нуормаҕа эппиэттир гына туппуттар уонна 59 м усталаах ускуустубаннай тутууну оҥорбуттар. Ол түмүгэр Аллараа Бэстээхтэн Төҥүлүгэ дылы айан суолун аспааллаабыттар (уопсайа 60 км). Дьаргалаах үрэххэ муостаны өрөмүөннээбиттэр, быйыл “Заячья петля” учаастакка (662-692 км) уонна “Нижний прижим” (1121-1142 км) учаастакка хапытаалынай өрөмүөн саҕаламмыта. Уопсайа 47 км усталаах тутуу 2024 сылга түмүктэниэҕэ.

Тарҕат:

Санааҕын суруй