Быйыл өрөспүүбүлүкэҕэ “Земскэй учуутал” бырагырааманы олоххо киллэриигэ 30 мөл. солк. тахса үбү көрдүлэр диэн Ил Дархан уонна бырабыыталыстыба дьаһалтатын пресс-сулууспата иһитиннэрэр.
“2020-2022 сс. Саха сиригэр уопсайа 50 квота бэриллибитэ, онтон былырыын 19 квотаны туһаммыппыт, онно 38 мөл. солк. ыытыллыбыта, 2021 сылга – 16 квота (32 мөл.солк.), 2022 сылга – 15 квота (30 мөл.солк.)”, - диэн иһитиннэриигэ ыйыллар. 2023 сылга эбии сөбүлэҥ быһыытынан 44 мөл. солк. 22 квота көрүллүөҕэ. Квотаҕа тиксиэн баҕалаахтартан сайаапканы тохсунньу 10 күнүттэн тутан саҕалаабыттара, кыайыылаахтары ыам ыйын 1-15 күннэригэр быһаарыахтара. Былырыын 124 баҕалаах учуутал баарыттан 19 учуутал квотаҕа тиксибитэ. Кинилэр 3 өрүттээх дуогабар түһэрсэн, өрөспүүбүлүкэ араас муннуктарыгар 5 сылга дуогабардаһан үлэлии сылдьаллар. Бырагыраама сүрүн сыала – тыа сиригэр хаачыстыбалаах үөрэҕи тэрийии буолар.
