2024 сыл түмүктэниэр дылы Саха сирин суолларыгар 4 улахан күргэни тутуохтара. Олортон саамай баараҕайдара уонна ураты суолталаахтарынан, "Бүлүү" федеральнай суолу "Лена" уонна "Халыма" суоллары кытары холбуур Өлүөнэ күргэтин тутуу буолуоҕа.
Бу күргэ тутулуннаҕына, үс федеральнай суол силбиһэн, Дьокуускай Арассыыйа атын эрэгийиэннэрин кытары сылы устата сиринэн сылдьыһар кыахтаныаҕа. Өлүөнэ күргэтин тутуу быйылгыттан саҕаланыаҕа. Күргэ уһуна - 3 км тахса, суукка устата 6 тыһ. массыынаны туоратар кыахтаах. Бу ыйааһыннаах күргэни мууһурууттан көмүскэллээх ыстаал канаттар тутуохтара. Өлүөнэ күргэтэ Уһук Хотуга уонна ирбэт тоҥҥо тутуллубут бастакы вантовой күргэннэн буолуоҕа. Күргэ тутуутугар 1200-тэн тахса киһи үлэлиэҕэ. Тутуу 2025 сылга түмүктэнэрэ былааннанар. Экэнэмиистэр ааҕалларынан, күргэ үлэҕэ киирдэҕинэ, сыллата Уһук Хотуга саамай наадалаах табаары тиэрдиигэ 4 млрд солк. тахса үбү экэниэмийэлиэҕэ. Оччоҕуна табаар да сыаната чэпчиэҕэ. Оннооҕор билигин Аллараа Бэстээххэ уонна Дьокуускайга бородуукта сыаната араастаһар. Ити парому кытары ыкса сибээстээх. Маны таһынан, күргэ тутулуннаҕына, өрөспүүбүлүкэҕэ 200 млрд солк. тахса инвестиция киирэрэр күүтүллэр. Оччоҕуна эбии 4,5 тыһ. тахса үлэ миэстэтэ тахсыаҕа.
