Арассыыйаҕа түүлээх (пушнина) сыаната 40-50 %-нан ыараабыт. Ол аата быйыл күһүҥҥүттэн түүлээх таҥас сыаната эмиэ ыарыахтаах. Ол туһунан Арассыыйа түүлээх сойууһун бэрэсидьиэнэ Сергей Столбов “Мягкое золото России” норуоттар икки ардыларынааҕы быыстапкаҕа кэпсээбит.
“Быйыл түүлээх сыаната 40-50 %-нан ыараабытынан, дьиҥнээх түүттэн тигиллэр таҥас-сап 30-40 %-нан үрдүөҕэ. Тоҕо диэтэххэ, кэлиҥҥи сылларга аан дойдуга тирии тиийбэт, дэписиит буолан турар. Аны туран, былырыын хамсык туран улахан кыһалҕалары үөскэттэ. Өскөтүн бэлэм таҥаһы-сабы оҥорон таһаарыы, производство туруга син этэҥҥэ буоллаҕына, кыылы иитэр хаһаайыстыбалар-тэрилтэлэр туруктара хайдах буолуо биллибэт, дьылҕалара уустук. Эбэн эттэххэ, быйыл Арассыыйаттан Кытайга тахсар түүлээх элбиэхтээх. Кытайдар аҥаардас былырыын эрэ 350 тыһыынча нуорканы атыыласпыттара. Быйыл икки төгүл элбэх түүлээх барара былааннанар. Уопсайынан, Кытай аан дойду биир саамай бөдөҥ атыылаһааччыта. Күн бүгүн кини аан дойду нуоркатын тириитин 80 %-нын атыылаһа олорор”, – диир С.Столбов.
