Войти

Войти

Арассыыйа бырабыытылыстыбата гааһы уһаайбаҕа диэри тардыыны босхо оҥорор гына, саҥа сокуон бырайыагын бэлэмнииргэ былааннананар. Маннык кыах өскөтүн дьиэлээх-уоттаах түөлбэ устун гаас турбата тардыллыбыт эрэ буоллаҕына сатанар буолуоҕа. Бу туһунан суруналыыстарга Арассыыйа вице-премьера Александр Новак иһитиннэрдэ, Владимир Путин Федерация Сэбиэтигэр анаабыт ыытыытын сиһилии арыйан туран.

«Бүгүн бэрэсидьиэн ылыммыт дьаһалларыгар олоҕуран, нэһилиэнньэттэн уһаайбаҕа диэри гаас тардыытын ороскуотун суох оҥорорго диэн этиитин иһитиннэрдэ. Билиҥҥи кэм туругуна өскөтүн гаас ситимэ бөһүөлэк уулуссатын устун барар буоллаҕына, дьиэлээх хаһаайын бэйэтин уһаайбатыгар диэри утах тардарыгар ороскуотун бэйэтин хармааныттан уйунар эбит буоллаҕына, бу сокуон олоххо киириэҕиттэн уһаайба хаһаайына бу өҥө иһин төлөөбөт буолуоҕа. Биһиги, дьиэлээх хаһаайын аны гаас ситимиттэн уһаайбаҕа диэри утах тардыргар төлөөбөт буолуутун туһунан сокуоҥҥа уларыйыылары киллэриэхпит», - диэн бэлиэтээтэ кини.

Ол эрээри, Новак чопчулаан эттэ, номнуо уһаайба бэйэтин иһигэр, хаһаайын дьиэтигэр диэри гааһын бэйэтин кыаҕынан тардыаҕа диэн.

«Уһаайба иһиттэн номнуо, кини бэйэтэ бас билэр чааһынай сирэ-уота саҕаланар, кини күрүөҕэ эрэ диэри төлөөбөт», - диэн быһаарда суруналыыстарга вице-премьер.

Арассыыйа бэрэсидьиэнэ Владимир Путин, арассыыйа олохтоохторо уһаайбаларын харчыга холботуо суохтаахтар диэн бүгүн тыл эттэ, уонна бырабыытылыстыбаҕа уонна эрэгийиэннэргэ сирдэрин-уоттарын гаастыырга сөптөөх сыал-сорук туруоралларыгар соруйда.

«Арассыыйа үгүс ыала билигин гаас ситимэ тардыллыбыт нэһилиэнньэлээх пууннарыгар олорон эрэ, ханнык эрэ биллибэт биричиинэлэринэн гааска холбонор кыахтара суох. Эмиэ да бу турар – турба, ол эрээри дьиэ гааска холбоммокко турар. Бырабыытылыстыбаҕа уонна эрэгийиэннэргэ маннык балаһыанньалаах турар нэһилиэнньэлээх пууннары гаастыырга соруйабын», - диэн тыл эттэ Путин Федеральнай мунньахха ыытыытыгар. «Мин «Биир Ньыгыл Арассыыйа» гааһы быһаччы уһаайба күрүөтүгэр диэри босхо тардыы туһунан этии киллэриитин толору өйүүбүн, дьон ороскуот көрсүө суохтаахтар », - диэн бэлиэтээтэ бэрэсидьиэн. Судаарыстыба баһылыга бу эйгэҕэ ханнык эмэ харгыстар үөскүүллэрин сатамматынан аахта, уонна бу сорук туолуутун, олоххо киириитин бэйэм тус хонтуруолбар ылабын диэн тоһоҕолоон туран ыйда.

Тарҕат:

Добавить комментарий