“Уһук Илин ипотеката” федеральнай бырагыраама үлэлээбит 1,5 сылын устата Саха сириттэн барыта холбоон 16,6 млрд солк. суумалаах 4,1 тыһ. тахса, ипотека дуогабара түһэрсиллибит.
Онон Саха сирэ Арассыыйа үрдүнэн маннык ипотеканы көхтөөхтүк туттубут 4 бастакы эрэгийиэҥҥэ киирсибит. Бастакы миэстэҕэ 23 млрд солк. суумалаах 5749 кирэдьиити биэрбит Приморье сылдьар эбит.
Санатан эттэххэ, маннык ипотеканы Уһук Илиҥҥэ олохтоох, 35 сааһыгар диэри ыал дьон эбэтэр сокуоннай сааһын туола илик оҕолоох соҕотох төрөппүт ылар кыахтаахтар. Ону таһынан маннык чэпчэтиини “Уһук Илин гектара” бырагыраамаҕа кыттан, тустаах эрэгийиэҥҥэ көһөн кэлбит, босхо гектар бырагырааматынан сир ылбыт олохтоох ыаллар туһаналлар. Кинилэргэ сааһынан хааччах суох.
