2020: АЛРОСА инвестицията – 16 млрд солкуобай

2021 сыл, от ыйын 27 күнэ. 2020 с. АЛРОСА социальнай эйгэҕэ уонна экология хайысхатыгар барыта 15,8 млрд солкуобайы (216 мөл. $) ороскуоттаата. Ол эбэтэр сыллааҕы бүттүүн барыһын 8 %-нын. Онон алмааһы хостуур бырамыысыланнас эйгэтигэр инники күөнтэн түспэтэ[1].

Ол курдук, хампаанньа 2020 с. социальнай инвестиция салаатыгар 10,2 млрд солкуобайы (141 мөл. дуоллар) ороскуоттаата. Ол иһигэр үлэһиттэри судаарыстыбаннайа суох биэнсийэ төлөбүрүнэн хааччыйыы, эрэгийиэн сайдыытын уонна үлэһиттэри, кинилэр дьиэ кэргэннэрин өйүүр тэрилтэ иһинээҕи бырагыраамалар үбүлээһиннэрэ, аһымал, өйүүр бырайыактар эмиэ киирэллэр. Үп-харчы улахан аҥаара социальнай инфраструктураны сайыннарарга туттуллар. Ол иһигэр балыыһалары, оскуолалары, дьон олорор дьиэлэрин, чөлүгэр түһэрэр киинэри уонна култуура-успуорт копмлекстарын саҥардыы киирэр.

“Социальнай” дэнэр ороскуот иһигэр АЛРОСА олохтоох бүддьүөттэргэ дивиденд быһыытынан төлүүр харчыта киирбэт. Хампаанньа дойдуга нолуогу төлүүр биир саамай улахан тэрилтэ буоларынан, 2020 с. 43,1 млрд солкуобай суумалаах нолуогу уонна булгуччулаах төлөбүрү төлөөтө. Онтон аҥаардас 60 %-нын – Саха өрөспүүбүлүкэтигэр. Саха сирэ хампаанньа аахсыйаларын 33 %-нын бас билэр буолан (муниципальнай тэриллиилэри ааҕан туран), дивиденд ылар.

Ааспыт сылга АЛРОСА экология тэрээһинигэр барыта 5,6 млрд солкуобайы (70 мөл. дуоллар) ороскуоттаата. Харчы улахан аҥаара бөҕү-саҕы харайарга уонна суох гынарга (утилизация), байытар баабырыкаларга айылҕа источниктарыттан ууну ылары аҕыйатарга, парниковай гаастары таһаарары аҕыйатарга, эниэргийэни көдьүүстээхтик туһанарга, алдьаммыт-кээһэммит сирдэри чөлүгэр түһэрэргэ туттулунна.

“АЛРОСА сайдыы боппуруоһугар мэлдьи да улахан болҕомтотун уурар. Үлэлиир эрэгийиэннэригэр сыл аайы араас хабааннаах социальнай уонна экология көҕүлээһиннэрин олоххо киллэрэр. 2020 сыл түмүгүнэн, хаампаанньа алмаас эйгэтигэр ESG инвестиция кээмэйинэн баһылыыр-көһүлүүр, инники күөҥҥэ сылдьар көрдөрүүтүн ыһыктыбата. Сыл аайы ити хайысхаҕа уопсай барыспыт 8 %-на инвестициялыыбыт. АЛРОСА сүрүн социальнай бырайыактарга көрөр үбүн-аһын таһынан, былырыын хоруона хамсыгын утары охсуһууга 1 млрд солкуобайтан тахса харчыны эбии ороскуоттаата. Үлэһиттэрин доруобуйатын туругун тупсарарга, куттал суоһаабатыгар үлэлэстэ, балыыһалары, мэдиссиинэ үлэһиттэрин өйөөтө. Экология инвестициятын көмөтүнэн хампаанньа тулалыыр эйгэни харыстыыр уонна ураты экосистиэмэни сайыннарар хайысхалаах бырайыактарын салгыы үлэлэттэ”, -- диэн АЛРОСА генеральнай дириэктэрэ Сергей Иванов кэпсээтэ.

Ыспыраапка:

АЛРОСА экология, социальнай эппиэтинэс, корпоративнай салайыы (ESG) боппуруостарыгар улахан болҕомтотун уурар уонна корпоративнай социальнай эппиэтинэс (corporate social responsibility, CSR) саамай үрдүк ирдэбилигэр эппиэттэһэр үлэни-хамнаһы ыытар. Хампаанньа сыл аайы 500-тэн тахса социальнай бырайыагы уонна айылҕаны харыстыыр көҕүлээһини олоххо киллэрэр. Онно “Алмаас көмөлөһөр” (“Diamonds that Care”) улахан бырагыраама чэрчитинэн, сыл аайы барыһын 8 %-на ороскуоттанар. АЛРОСА социальнай эйгэҕэ уонна экологияҕа инвестициятын кээмэйэ хампаанньа тэхиниичэскэй сайдыытыгар, хостуур кыаҕы улаатыннарар, инфраструктураны тупсарар бырагыраамаларын үбүлээһинигэр тэҥнэһэр – сылга 20-25 млрд солк.  

[1] АЛРОСА тэрилтэ иһинээҕи сыанабылын түмүгүнэн.