Киир

Киир

АЛРОСА хампаанньа Кэтиир сүбэтэ Горнай улууһун Бэс Күөлэ бөһүөлэгэр өрт уотуттан эмсэҕэлээбит дьоҥҥо дьиэни-уоту тутууга бэриллиэхтээх 200 мөлүйүөн солкуобайдаах көмө төлөбүрү бигэргэттэ. Ити харчы дьон олорор дьиэтин уонна кэккэ хаһаайыстыбаннай инфраструктураны чөлүгэр түһэрэргэ, саҥаттан тутарга анаан тыырыллар.

“Бу курдук уустук кэмҥэ АЛРОСА хампаанньа Саха өрөспүүбүлүкэтин салалтатын кытта ыкса ситимнээхтик, биир санаанан үлэлии олорор. Туох кыалларынан көмөлөһөр. Бу харчы эмсэҕэлээбиттэргэ күүс-көмө, өйөбүл буолуо, кинилэр бу кылгас кэм иһигэр, кыстык кэлиэр диэри, дьиэлэнэ-уоттана охсуохтара диэн эрэнэбит”, – диэн АЛРОСА генеральнай дириэктэрэ, бырабылыанньа бэрэссэдээтэлэ Сергей Иванов санаатын үллэһиннэ.

IMG 20210825 WA0002

Ити ыйыллыбыт көмө АЛРОСА хампаанньа Саха Өрөспүүбүлүкэтин Үүнэр көлүөнэ тус сыаллаах пуондатыгар сыл аайы көрөр харчытын таһынан, эбии төлөбүр быһыытынан бэриллиэҕэ.

Санаттахха, атырдьах ыйын 19 күнүгэр өрөспүү­бүлүкэ Ил Дархана Айсен Николаев Бэс Күөлүгэр тутуу үлэтэ саҕаламмытын эппитэ. Ити күн бөһүөлэк Кэскил түөлбэтигэр бастакы сыбаайа түспүтэ. Күн бүгүн СӨ Үүнэр көлүөнэ тус сыаллаах пуондата эмсэҕэлээбит дьону уонна бэдэрээттээх хампаанньалары кытта туһааннаах дуогабардары түһэрсэр. Бэс Күөлүгэр туох даҕаны тардылыга, үгүс-элбэх отчуота, кумааҕыны толоруута суох тутуу матыйааллара тиийэн эрэллэр.

IMG 20210825 WA0003

“Бу күннэргэ биһиги тутуу тохтоон, атахтанан хаалбатын туһугар, үбү-харчыны түргэнник уонна чопчу ыытыахтаахпыт. Ити биһиги сүрүн сорукпут буолан турар. Өрт уотун умулларар үлэ-хамнас өрөспүүбүлүкэни бүттүүн түмнэ, биир өйгө-санааҕа сомоҕолоото. Биһиги бу суһал тутууга үлэлэһэ сылдьар хас биирдии кыттыгастаах киһиэхэ түргэн тэтимнээх үлэлэрин иһин махталбытын тиэрдэбит. Салалта болдьообут кэмигэр бары көмөлөөн үлэни-хамнаһы кыайыахпыт диэн эрэнэбин”, – диэн пуонда генеральнай дириэктэрэ Владимир Егоров кэпсээтэ.

IMG 20210825 WA0004

IMG 20210825 WA0005

IMG 20210825 WA0007

2021 сыл олунньутугар АЛРОСА хампаанньа СӨ Үүнэр көлүөнэ тус сыаллаах пуондатын кытта бииргэ үлэлэһэр сөбүлэҥин уһаппыта. Ол чэрчитинэн, АЛРОСА өрөспүүбүлүкэ социальнай суолталаах кыһалҕаларын быһаарарга тус сыаллаах көмөнү оҥоруохтаах. Ол иһигэр култуура, үөрэхтээһин, доруобуйа харыстабылын, физкультура уонна успуорт эбийиэктэрин тутарга, оҕону-ыччаты аан дойду таһымынан үөрэтэргэ, тулалыыр эйгэни харыстыырга көмөлөһүөхтээх. Онно анаан АЛРОСА хампаанньа 2021 сыллаахха пуондаҕа 850 мөлүйүөн солкуобайы ыытыахтаах. Ити иннинэ, 2011 сылтан саҕалаан 2020 сылга диэри, хампаанньа Үүнэр көлүөнэ тус сыаллаах пуондатыгар бииргэ үлэлэһэрин быһыытынан, барыта 7,2 миллиард солкуобайы биэрбитэ.

Тарҕат:

Санааҕын суруй

Бүтэһик сонуннар