2021 сыл Балаҕан ыйыгар өрспүүбүлкэ бырабыыталыстыбата бүддьүөт үлэһиттэрин сорох категорияларыгар хамнастарын үрдэтэргэ быһаарыыны ылыммыт.
Үлэ министиэристибэтин пресс-киинэ иһитиннэрэринэн, оҕо уһуйааннарын иитээччилэрэ, эбии үөрэхтээһин уонна тулаайах оҕолор дьиэлэрин педагогтара, наука үлэһиттэрэ, үрдүк үөрэх преподавателлэрэ, култуура уонна социальнай хайысха үлэһиттэрэ хамнастара үрдүөҕэ.
«Маныаха, бу сыл саҕаланыаҕыттан хамнаһы иккистээн ааҕыы олохтонуо. Хамнас үлэһит таһымыттан көрөн 3%-н 16%-ҥа диэри улаатыаҕа», - диэн этиллэр.
Министиэристибэҕэ этиллэринэн, 2021 сылга Арассыыйа бэрэсидьиэнин стратегическай укаастарынан, эрэгийиэҥҥэ үлэ орто дохуотуттан хамнастара 100% уонна 200% үрдүөхтээх бүддьүөт эйгэтин үлэһиттэрин категориялара номнуо быһаарыллыбыт эбит.
Арассыыйа бэрэсидьиэнэ быһаарбытынан, бу сыл Балаҕан ыйыттан орто профессиональнай үөрэхтээһин куратордарыгар ый ахсын харчы көрүллүөхтээх, маныаха оройуоннааҕы уонна хоту дойдуга олорорун иһин эбиитэ учуоттаныллан 12,5 тыһыынчаттан 14 тыһыынча буолуохтаах. Оттон 2020 сыллаахха маннык курдук төлөбүр оскуолаҕа кылаас салайааччыларыгар анаммыта.
Саха сирин Үлэ уонна социальный сайдыытын министиэристибэтигэр эппиттэринэн, Арассыыйа бэрэсидьиэнин «ыам ыйынааҕы» укааһыгар хапсыбатах атын категориялаах бүддьүөт үлэһиттэригэр тохсунньу 1 күнүттэн хамнаска 3% эбиллии көрүллүбүт, оттон судаарстыбаннай уонна олохтоох дьаһаллар үлэһиттэригэр эрдэ эмиэ 3% үрдүүрүн туһунан бу сыл от ыйын маҥнайгы күнүттэн быһаарыллыбыт.
Үлэ миниистирэ Елена Волкова эрдэ бүддьүөт үлэһиттэрин хамнастара уларыайыахтааҕын туһунан эппитэ. Кини бэлиэтииринэн, 2021 сылга тохсунньу 1 күнүттэн тус сыаллаах категорияҕа киирсэр бүддьүөт уонна култуура үлэһиттэрин хамнастара улааппыт эбит.
Сахастат көрдөрүүтүнэн, 2021 с. тохсунньу-кулун тутар ыйдарга орто хамнас көрдөрүүтэ маннык буолбут:
► оскуолаҕа киириэн иннинээҕи үөрэх кыһатын педагогтара — 52 409 рублей;
► эбии үөрэхтээһин педагогтара — 60 887 рублей;
► тулаайах оҕолор дьиэлэрин педагогтара— 70 874 рубля;
► наука үлэһиттэрэ — 107 783 рубля;
► үөрдүк үөрэх кыһатын преподавателлэрэ— 133 253 рубля;
► култуура үлэһиттэрэ — 63 134 рубля;
► социальнай үлэһиттэр — 68 655 рублей.
