Олунньу 25 күнүгэр, Украина айдааныттан дуоллар үрдээтин кытары, “DNS” бытовой техника уонна электроника маҕаһыынын салайааччыта Дмитрий Алексеев табаарын сыанатын 30% үрдэтэрин туһунан эппитин элбэхтик кэпсээтилэр, суруйдулар.
Ити быһыыны атыы-эргиэн эйгэтин үтүө суобастаах сорох бэрэстэбиитэллэрэ сүөргүлүү истибиттэрэ. Оттон сорох өс киирбэх олохтоохтор тута “DNS” тэрилтэни байыта сүүрбүттэрэ. Ону салайааччы бэйэтэ “атыыбыт элбээтэ, харчы киириитэ үрдээтэ” диэн бигэргэппитэ биллэр.
Онуоха финансистар билигин, иннэ-кэннэ биллибэт кэмҥэ, харчыны мээнэ ыскайдыыртан туттунуҥ диэн сүбэлииллэр. Оттон бастакынан сыананы үрдэппит “DNS” тэрилтэҕэ ФАС (федеральнай антимонопольнай сулууспа) бэрэбиэркэтэ бара турар. Ол түмүгэ биллэ илик.
Сорох дьон, дойдуга ыарахан кэм бүрүүкээн турарын туһанан, сыананы талбытынан үрдэтэр атыыһыттары прокуратураҕа үҥсэн иһиҥ уонна кинилэртэн атыылаһымаҥ диэн ыҥыраллар.
Кырдьыга да, маннык кэмҥэ бүттүүн паникаҕа киирэн биэрбэккэ, толкуйдаан хамсанар ордук буоллаҕа.
Ковид-19 саҥардыы кэлбит кэмигэр дьон бары ас атыылаһа сүүрбүтүн өйдүүр инигит? Ол саппаас сорох дьоҥҥо бүтэ илик сурахтаах.
